Arvind kejariwal Arrest : हा तर लोकशाहीवर हल्ला; ममता बॅनर्जी यांचा भाजपवर हल्लाबोल

कथित अबकारी कर घोटाळा प्रकरणी दिल्लीचे मुख्यमंत्री अरविंद केजरीवाल यांना ईडीने गुरुवारी रात्री त्यांच्या निवासस्थानातून अटक केली आहे. त्यांच्या अटकेनंतर देशातील राजकीय वातावरण तापलं असून विरोधकांकडून संतप्त प्रतिक्रिया येत आहेत. अशातच आता पश्चिम बंगालच्या मुख्यमंत्री ममता बॅनर्जी यांनी भाजपवर हल्लाबोल करत हा लोकशाहीवरील हल्ला असल्याचे म्हटले आहे.

सोशल मीडिया प्लॅटफॉर्म एक्सवर ममता बॅनर्जी यांनी लिहीले की, ‘जनतेने निवडून दिलेले दिल्लीचे विद्यमान मुख्यमंत्री अरविंद केजरीवाल यांच्या अटकेचा मी तीव्र शब्दांत निषेध करते. मी माझा पाठिंबा दर्शविण्यासाठी आणि एकजूट वाढवण्यासाठी सुनीता केजरीवाल यांच्याशी संपर्क साधला आहे. निवडून आलेल्या विरोधी मुख्यमंत्र्यांना जाणूनबुजून लक्ष्य करून अटक केली जात आहे. सीबीआय, ईडीच्या तपास सुरू नेत्यांना विशेष करून भाजपसोबत युती केल्यानंतर त्यावर पांघरुण घातले जात आहे, हे संतापजनक आहे. हा लोकशाहीवर केलेला हल्ला आहे.’

I vehemently condemn the arrest of Arvind Kejriwal, the sitting elected Chief Minister of Delhi elected by the people. I have personally reached out to Smt Sunita Kejriwal to extend my unwavering support and solidarity. It’s outrageous that while elected opposition CMs are being…

— Mamata Banerjee (@MamataOfficial) March 22, 2024

ममता पुढे म्हणाल्या, ‘आमची ‘इंडिया’ आघाडी निवडणूक आयोगाला भेटून विरोधी पक्षांच्या नेत्यांना मुद्दाम लक्ष्य करणे आणि अटक करण्यावर तीव्र आक्षेप व्यक्त करणार आहे. यासाठी तृणमूल काँग्रेसकडून खासदार डेरेक ओ’ब्रायन आणि नदीमुल हक आयोगासोबतच्या या महत्त्वाच्या बैठकीत पक्षाचे प्रतिनिधित्व करतील.