जुलैमध्ये म्हाडाची चार हजार घरांसाठी लॉटरी; ठाणे, कल्याणमध्ये सर्वाधिक घरे

येत्या दिवाळीत म्हाडाची मुंबईतील पाच हजार घरांसाठी लॉटरी येणार आहे. तत्पूर्वी जुलै महिन्यात म्हाडाच्या कोकण मंडळाकडून सुमारे चार हजार घरांची बंपर लॉटरी काढली जाणार आहे. यातील सर्वाधिक घरे ठाणे आणि कल्याणमध्ये असणार आहेत, अशी माहिती सूत्रांनी दिली.

म्हाडातर्फे दरवर्षी राज्यात सुमारे 30 हजार घरांची लॉटरी काढण्याचे नियोजन आहे. त्यानुसार दर तीन ते चार महिन्यांनी कुठल्या ना कुठल्या मंडळाची लॉटरी निघणार आहे. गेल्या दीड वर्षात म्हाडा कोकण मंडळाने तीन लॉटरी काढल्या असून सुमारे दहा हजार जणांचे घराचे स्वप्न साकार केले आहे. आता जुलै महिन्यात पुन्हा एकदा सुमारे चार हजार घरांची लॉटरी काढण्याची तयारी कोकण मंडळाने सुरू केली आहे. यात म्हाडाने स्वतः चितळसर येथे उभारलेल्या 1173 घरांसह हाऊसिंग स्टॉकमधून म्हाडाला मिळालेल्या घरांचादेखील समावेश असणार आहे. कल्याण येथे एकाच खासगी विकासकाकडून म्हाडाला अडीच हजार घरे उपलब्ध होणार असून यांचादेखील लॉटरीमध्ये समावेश केला जाणार आहे.

चितळसर येथील घरांचा पाण्याचा प्रश्न सुटला
चितळसर येथे म्हाडाने 22 मजली सात इमारती उभारल्या असून येथील पाण्याचा प्रश्न प्रलंबित असल्याने ठाणे महानगरपालिकेकडून अद्याप या इमारतींना ओसी मिळालेली नाही. या पार्श्वभूमीवर म्हाडा आणि ठाणे महापालिका अधिकाऱयांची नुकतीच बैठक झाली असून सदर प्रकल्पासाठी ‘अमृत’ योजनेंतर्गत महापालिका पाण्याची टाकी बांधणार आहे. तोपर्यंत येथील घरांना पाणीपुरवठा करण्यासाठी तात्पुरती जलवाहिनी टाकली जाणार आहे. त्यानंतर ओसी मिळताच येथील घरांचा लॉटरीमध्ये समावेश केला जाणार असल्याचे सूत्रांनी सांगितले.