रत्नागिरी – पाकिस्तान जिंदाबादच्या घोषणा देणाऱ्याला चोपले

ऑपरेशन सिंदूर यशस्वी झाल्यानंतर पाकिस्तानविषयी प्रेम दाखवणाऱ्या तरुणाला देशप्रेमी रत्नागिरीकरांनी इंगा दाखवला. समाजमाध्यमांत पाकिस्तान जिंदाबाद लिहिणाऱ्या व पंतप्रधान नरेंद्र मोदींची निंदा करणाऱ्या तरुणाला रत्नगिरीकरांनी चोप दिला. जखमी तरुणाला उपचारासाठी जिल्हा शासकीय रुग्णालयात दाखल करण्यात आले असून शहर पोलिस ठाण्यात संशयित तरुणाविरुद्ध गुन्हा दाखल केला आहे. तसेच तो ज्या आस्थापनेत कामाला होता तेथून त्याला काढून टाकण्यात आले आहे.

महम्मद बद्रुद्दीन परकार (वय 21, मुळः केजीएम प्लाझा, गोवळकोट, चिपळूण. सध्या रा.महादेव नगर, रत्नागिरी) असे संशयित तरुणाचे नाव आहे. ही घटना बुधवारी (ता. 7) रात्री निदर्शनास आली. पोलिसांकडून मिळालेल्या माहितीनुसार पहलगाम येथे 22 एप्रिलला झालेल्या दहशतवादी हल्ल्याला प्रत्युत्तर म्हणून हिंदुस्थानने 6 आणि 7 मे च्या मध्यरात्री पाकव्याप्त काश्मीरवर हल्ला करत दहशतवाद्यांची नऊ ठिकाणे उद्ध्वस्त केली. एका मुस्लीम युवकाने उघडपणे ‘पाकिस्तान जिंदाबाद…मोदी किलर आहे…मोदी मुळे हे घडत आहे पाकिस्तान साठी प्रार्थना करा’ असे स्टेट्स संशयिताने त्याच्या इंस्टाग्राम आणि व्हॉट्सअॅपला ठेवून ते व्हायरल केले. यामुळे खळबळ उडाली. देशप्रेमी रत्नागिरीकरांच्या ही गोष्ट लक्षात आली. हा तरुण एका प्रसिद्ध आस्थापनेत काम करतो. त्या आस्थापनेत जाऊन रत्नागिरीकरांनी माहिती घेतली असता त्या युवकाला स्टेटसमुळे आदल्या दिवशीच कामावरून काढून टाकल्याचे सांगण्यात आले. त्यानंतर रत्नागिरीकर देशप्रेमी तरुणांनी त्या तरुणाला आज शोधून गाठले. त्याला यथेच्छ चोप दिला.

रत्नागिरीकर देशप्रेमी तरुणांनी चोप दिल्यानंतर जखमी अवस्थेत तरुणाला पोलिसांनी जिल्हा शासकीय रुग्णालयात दाखल करण्यात आले असून त्याच्यावर उपचार सुरू आहेत. मात्र अनुचित प्रकार घडू नये यासाठी पोलिस प्रशासनाने दंगल पथकाला पाचारण केले होते. शहर पोलीस निरीक्षक शिवरकर यांच्यासह पोलिस पथकही याठिकाणी दाखल झाले होते. शहर पोलिस ठाण्यात संशयित तरुणाविरुद्ध गुन्हा दाखल करण्यात आला आहे.