पहलगाम दहशतवादी हल्ल्याच्या 16 दिवसांनंतर, हिंदुस्थानने मंगळवारी मध्यरात्री ‘ऑपरेशन सिंदूर’द्वारे सर्जिकल स्ट्राईक केला. या आपरेशनमध्ये पाकिस्तानमधील अनेक दहशतवादी तळ उद्ध्वस्त केले. हिंदुस्थानने पाकिस्तानच्या सीमेवरील दहशतवाद्यांचे 9 तळ उद्ध्वस्त केले. यामध्ये पुलवामा दहशतवादी हल्ल्याचा कट रचण्यात आलेल्या जैश-ए-मोहम्मदच्या मुख्यालयाचाही समावेश आहे.
पंजाबमधील बहावलपूर, पाकिस्तानमधील मरकज सुभान अल्ला हे जैश-ए-मोहम्मदचे ऑपरेशनल मुख्यालय होते. पुलवामा हल्ल्याचा कट याच मरकजमध्ये सुमारे 6 वर्षांपूर्वी 14 फेब्रुवारी 2019 ला रचण्यात आला होता. केवळ पुलवामाच नाही तर इतर अनेक दहशतवादी कटही याच मरकजमधून रचण्यात आले होते. पुलवामा हल्ल्यातील दहशतवाद्यांना याच कॅम्पमध्ये प्रशिक्षण देण्यात आले होते.
मरकज सुभान अल्लाह ही दहशतवादी संघटना नियमितपणे लोकांना शस्त्रे, शारीरिक आणि धार्मिक प्रशिक्षण देत असे. जैशशी संबंधित असलेले प्रमुख दहशतवादी, मुफ्ती अब्दुल रौफ असगर (जैश-ए-मोहम्मदचा प्रत्यक्ष प्रमुख) आणि मौलाना मसूद अझहरचा दुसरा भाऊ आणि त्याचा मेहुणा युसूफ अझहर उर्फ उस्ताद घोरी, जो जैश-ए-मोहम्मदच्या (सशस्त्र) शाखेचा प्रमुख होता, हे देखील त्याच संकुलात राहत होते.
मरकज सुभान अल्लाह बहावलपूरच्या बाहेरील भागात राष्ट्रीय महामार्ग कराची येथे होते. 15 एकर क्षेत्रात पसरलेले मरकज जैश-ए-मोहम्मदचे मुख्यालय होते. येथील तरुणांना दहशतवादाचे प्रशिक्षण देण्यात आले. जैश-ए-मोहम्मदचे प्रमुख मौलाना मसूद अझहर, मुफ्ती अब्दुल रौफ असगर, मौलाना अम्मार आणि इतर कुटुंबातील सदस्यांची घरेही येथे होती.
हे मरकझ जैश-ए-मोहम्मदचे ऑपरेशन्स मुख्यालय म्हणून काम करत असे. तथापि, पहलगाम हल्ल्यानंतर हिंदुस्थाकडून संभाव्य कारवाईच्या भीतीने पाकिस्तानने मौलाना मसूद अझहरला येथून काढून इस्लामाबाद किंवा रावळपिंडीतील एखाद्या अज्ञात ठिकाणी ठेवले आहे. पाकिस्तानी अधिकारी त्याला कडक सुरक्षा पुरवत आहेत.
जैशच्या वरच्या दहशतवाद्यांच्या घरांव्यतिरिक्त, येथे 600 हून अधिक कामगार राहत होते. मरकज सुभान अल्लाह हे जैशने पाकिस्तानच्या प्रांतीय आणि संघीय सरकारांकडून तसेच ब्रिटनसह काही आखाती आणि आफ्रिकन देशांकडून उभारलेल्या निधीच्या मदतीने बांधले गेले होते.
About The Author
Comment List