हिंदुस्थानचा माजी क्रिकेटपटू आणि मुख्य प्रशिक्षक गौतम गंभीर याला ईमेलद्वारे जीवे मारण्याची धमकी मिळाली आहे. या ई-मेलच्या सबजेक्टमध्ये ‘ISIS’ (इस्लामिक स्टेट) असा होता. ईमेलमध्ये फक्त तीन शब्द होते, ‘मी तुला मारेन’ (I kill you).
धमकीचा ईमेल मिळाल्यानंतर, गंभीरने राजेंद्र नगर पोलीस ठाण्यात तक्रार दाखल केली. अद्याप कोणताही औपचारिक गुन्हा दाखल झालेला नसला तरी, सायबर सेल ई-मेलचे मूळ शोधण्यासाठी आणि पाठवणाऱ्याची ओळख पटविण्यासाठी प्रयत्न करत आहे.
जम्मू आणि कश्मीरच्या पहलगाममध्ये पर्यटकांवर झालेल्या दहशतवादी हल्ल्यानंतर दोन दिवसांनी ही धमकी देण्यात आली आहे. हा हल्ला प्रतिबंधित दहशतवादी गट लष्कर-ए-तैयबा (LeT) ची शाखा असलेल्या रेझिस्टन्स फ्रंटच्या सदस्यांनी केला होता. गंभीरने पूर्वी दहशतवादाविरुद्ध उघडपणे आपले मत मांडले होते. 2021 मध्ये, माजी क्रिकेटपटूलाही ISIS कश्मीरकडून अशीच धमकी मिळाली होती.
मंगळवारी गंभीरने X वर पहलगाम येथील पर्यटकांवर झालेल्या दहशतवादी हल्ल्याचा निषेध केला. 2019 च्या पुलवामा हल्ल्यानंतरच्या सर्वात घातक घटनांपैकी एक म्हणजे, बैसरन पठारावर दहशतवाद्यांनी पर्यटकांवर गोळीबार केला. ‘मृतांच्या कुटुंबियांसाठी प्रार्थना. यासाठी जबाबदार असलेल्यांना किंमत मोजावी लागेल. हिंदुस्थान हल्ला करेल’, असे गंभीरने पोस्ट केले.
सुट्टीवर असलेला गंभीर अलीकडेच फ्रान्समधून कौटुंबासह परतला आहे. मार्चमध्ये हिंदुस्थानच्या चॅम्पियन्स ट्रॉफी जेतेपदानंतर तो मोठ्या प्रमाणात प्रकाशझोतात राहिला आहे. इंडियन प्रीमियर लीग 2025 सध्या सुरू असल्याने, राष्ट्रीय संघाच्या मुख्य प्रशिक्षकांना सहसा स्पर्धेदरम्यान सुट्टी मिळते. गेल्या वर्षी जुलैमध्ये टीम इंडियाच्या मुख्य प्रशिक्षकपदाची सूत्रे स्वीकारणारा गंभीर विश्वचषक विजेता प्रशिक्षक राहुल द्रविड याच्या जागी आला आहे.
Comment List