राजस्थानमधील एका रुग्णालयात संतापजनक घटना उघडकीस आली आहे. डॉक्टरांनी रुग्णाऐवजी त्याच्या वडिलांवर शस्त्रक्रिया केली. त्यानंतर आपली चूक झाल्याचे लक्षात येताच त्यांनी रुग्णाच्या वडिलांना ऑपरेशन थिएटरबाहेर आणून बसवले. कोटा येथील वैद्यकीय महाविद्यालयातील रुग्णालयात ही घटना घडली. याप्रकरणी रुग्णाच्या नातेवाईकांनी रुग्णालय प्रशासनाकडे तक्रार केली असून प्रकरणाची चौकशी सुरू आहे.
अटरु परिसरातील मनिषचा काही दिवसांपूर्वी अपघात झाला होता. अपघातात त्याच्या हाताला दुखापत झाली होती. यामुळे त्याच्या हातावर शस्त्रक्रिया करावी लागेल असे डॉक्टरांनी सांगितले. त्यानुसार मनिषवर शस्त्रक्रिया होणार होती.
यादरम्यान जगदीश नामक रुग्णाचीही हाताची शस्त्रक्रिया होणार होती. यासाठी जगदीश नामर रुग्ण ऑपरेशन थिएटरबाहेर बसला होता. मनिषच्या वडिलांचे नावही जगदीश होते आणि ते ही मुलासोबत ऑपरेशन थिएटरबाहेर बसले होते. यावेळी डॉक्टरांनी जगदीश नामक रुग्णाला आवाज दिला. मात्र जगदीश नाव ऐकून मनिषचे वडील उभे राहिले.
डॉक्टरांनी त्यांना ऑपरेशन थिएटरमध्ये नेले. रुग्णाची ओळख न पटवता डॉक्टरांनी जगदीश यांना भूल दिली आणि हातावर कट मारला. यानंतर डॉक्टरांना आपली चूक लक्षात आली आणि त्यांनी लगेच जगदीश यांच्या हातावर टाके मारून त्यांना ऑपरेशन थिएटरबाहेर आणून बसवले. यानंतर जगदीश यांच्या नातेवाईकांनी रुग्णालय प्रशासनाकडे लेखी तक्रार दिली. रुग्णालय प्रशासन डॉक्टरांवर काय कारवाई करते याकडे सर्वांचे लक्ष लागले आहे.
Comment List