Breast Feeding- स्तनपान करणाऱ्या मातांनी कोणत्या चुका टाळायला हव्यात, जाणून घ्या!

मुलांसाठी आईचे दूध हे सर्वात महत्वाचे आहे. नवजात बाळाचा योग्य मानसिक आणि शारीरिक विकास सुनिश्चित करण्यासाठी, डॉक्टर जन्मापासून ते 6 महिन्यांपर्यंत केवळ स्तनपान देण्याची शिफारस करतात. बाळाच्या जन्मानंतर, अनेक महिलांसाठी स्तनपान करणे खूप सोपे होते, तर काहींसाठी हे काम कठीण ठरते. स्तनपान सोपे करण्यासाठी महिला बऱ्याचदा कुटुंबातील सदस्यांची मदत घेतात, परंतु तरीही काही चुका होतात. बहुतेक स्तनपान देणाऱ्या माता काही चुका करत असतात. या चुका कशापद्धतीने टाळायला हव्यात हे आपण बघुया.

बहुतेक महिला त्यांच्या नवजात बालकांना झोपून दूध पाजतात. ही नवीन मातांनी केलेल्या सर्वात सामान्य चुकांपैकी एक आहे. झोपून नवजात बालकाला दूध पाजल्याने एस्पिरेशनचा धोका वाढतो. कधीकधी यामुळे बाळाच्या फुफ्फुसात दूध अडकू शकते, ज्यामुळे श्वास घेण्यास त्रास होऊ शकतो. म्हणूनच बाळाला झोपवताना कधीही दूध पाजू नये.

 

आईची आणखी एक चूक म्हणजे बाळाला जास्त वेळ स्तनपान देणे. काही स्तनदा माता आपल्या बाळांना सतत एक किंवा दीड तास दूध पाजत राहतात, जे पूर्णपणे चुकीचे आहे. बाळाला 15-20 मिनिटे दूध पाजणे पुरेसे आहे; त्यांना यापेक्षा जास्त स्तनपानाची आवश्यकता नाही.

काही महिला त्यांच्या नवजात बाळाला स्तनपान देण्याऐवजी बाजारात मिळणारे फॉर्म्युला मिल्क देऊ लागतात, परंतु हे चुकीचे आहे. बाळाच्या जन्मापासून ते 6 महिन्यांपर्यंत स्तनपान केले पाहिजे. यामुळे आई आणि बाळाला अनेक फायदे मिळतात. फॉर्म्युला मिल्क हे आईच्या दुधासारखे नसते आणि त्यात रोगप्रतिकारक शक्ती वाढवणारे घटक नसतात. जर कोणत्याही परिस्थितीत बाळाला फॉर्म्युला मिल्क द्यावे लागले तर त्यासाठी प्रथम डॉक्टरांचा सल्ला घ्यावा.

स्तनपान करताना महिला अनेकदा स्वतःकडे लक्ष देत नाहीत, ज्यामुळे त्यांना भविष्यात अनेक समस्यांना तोंड द्यावे लागते. तज्ञांचे म्हणणे आहे की आईच्या शरीरात बाळासाठी योग्य प्रमाणात दूध तयार होण्यासाठी तिला योग्य पोषक तत्वांची आवश्यकता असते. यासाठी महिलांनी त्यांच्या आहारात कॅल्शियम, लोह आणि प्रथिने समृद्ध असलेल्या गोष्टींचा समावेश करायला हवा.