SRH Vs RR – सनरायझर्स हैदराबादची विजयी सलामी! राजस्थान रॉयल्सचा 44 धावांनी केला पराभव, इशान किशनचे स्फोटक शतक

सनरायझर्स हैदराबादने आयपीएल 2025 ची सुरुवात विजयाने केली आहे. रविवारी झालेल्या पहिल्या सामन्यात संघाने राजस्थान रॉयल्सचा 44 धावांनी पराभव केला. हैदराबादच्या राजीव गांधी आंतरराष्ट्रीय स्टेडियमवर झालेल्या या सामन्यात सनरायझर्सने प्रथम फलंदाजी करताना 20 षटकांत 6 बाद 286 धावा केल्या होत्या. या विजयासह सनरायझर्सने आपल्या यंदाच्या हंगामात दमदार सुरुवात केली.

सनरायझर्सची विस्फोटक फलंदाजी

सनरायझर्स हैदराबादच्या फलंदाजांनी राजस्थानच्या गोलंदाजांची चांगलीच धुलाई केली. ईशान किशनने आपल्या नव्या संघासाठी पहिल्याच सामन्यात 47 चेंडूत नाबाद 106 धावांची खेळी खेळली. ज्यात त्याने 6 षटकार ठोकले. ट्रॅव्हिस हेडने 31 चेंडूत 67 धावा, तर हेन्रिक क्लासेनने 14 चेंडूत 34 धावा केल्या. नितीश कुमार रेड्डीनेही 30 धावांचे महत्त्वपूर्ण योगदान दिले. या खेळीच्या जोरावर सनरायझर्सने 286 धावांचा डोंगर उभा केला.

राजस्थान रॉयल्सचा कर्णधार रियान परागने नाणेफेक जिंकून प्रथम गोलंदाजीचा निर्णय घेतला. पण हा निर्णय त्यांच्या गोलंदाजांना महागात पडला. जोफ्रा आर्चर, संदीप शर्मा आणि तुषार देशपांडे यांच्यासह सर्व गोलंदाजांना सनरायझर्सच्या फलंदाजांनी चांगलेच कुटले.

राजस्थानची धावसंख्या 242 वर थांबली

287 धावांच्या आव्हानाचा पाठलाग करताना राजस्थान रॉयल्सची सुरुवात खराब झाली. यशस्वी जयस्वाल (1), नितीश राणा (11) आणि रियान पराग (4) हे फलंदाज सुरुवातीलाच बाद झाले. त्यानंतर संजू सॅमसनने 66 आणि ध्रुव जुरेलने 35 चेंडूत 70 धावांची खेळी खेळून संघाला सामन्यात टिकून ठेवण्याचा प्रयत्न केला. शिमरॉन हेटमायरने 23 चेंडूत 42 आणि शुभम दुबेनेही काही धावा केल्या, पण हे प्रयत्न अपुरे ठरले. राजस्थानची धावसंख्या 20 षटकांत 6 बाद 242 वर थांबली आणि संघाला पराभवाला सामोरे जावं लागलं.