सासरच्या मंडळींनी गाठला क्रूरतेचा कळस; हुंड्यात 21 लाख आणि आलिशान कार, विवाहितेवर लक्ष ठेवण्यासाठी बसवले कॅमेरे

हुंडय़ात 21 लाख रुपये आणि फॉर्च्युनर गाडी न मिळाल्याने सासरच्यांनी विवाहित महिलेला मारहाण केली. विवाहितेवर लक्ष ठेवण्यासाठी सीसीटीव्ही कॅमेरेही बसवले. सासरच्या मंडळींच्या क्रूरतेने कळस गाठला. उत्तर प्रदेशातील ही धक्कादायक घटना आहे.

विजय नगर पोलीस स्टेशन परिसरातील तरुणीचा विवाह दोन वर्षांपूर्वी कवी नगर भागातील तरुणाशी झाला होता.  तिच्या कुटुंबाने लग्नात 45 लाख रुपये खर्च केले आणि हुंडा म्हणून रोख रक्कम, दागिने, कपडे, फर्निचर, इलेक्ट्रॉनिक वस्तू आणि एक कार दिली. लग्नानंतर तिच्या सासरच्या मंडळींच्या मागण्या वाढल्या. अवघ्या 15 दिवसांनी पतीने तिच्याकडे 5 लाख रुपयांची मागणी केली. पीडीत मुलीच्या वडीलांनी पाच लाख रुपये दिले. यानंतरही सासरच्या मंडळींची हाव सुटेना. त्यांनी 21 लाख रुपये रोख आणि फॉर्च्युनर कारची मागणी केली.

या मागण्या मुलीच्या माहेरच्या लोकांनी पूर्ण केल्या नाहीत. त्यामुळे सासरच्या मंडळींनी तिला मारहाण केली. शिवीगाळ करण्यात आली आणि जीवे मारण्याची धमकी देण्यात आली.  गेल्या वर्षी जानेवारीमध्ये पीडितेने मुलाला जन्म दिला. पण तरीही विवाहितेच्या सासरच्या लोकांच्या वागण्यात कोणताही बदल झाला नाही. तिच्या सासरच्यांनीही तिचा विनयभंग केला,असा आरोपही विवाहितेने केला. त्रासलेल्या पीडितेने या प्रकरणाची पोलिसांकडे तक्रार केली. पोलिसांनी गुन्हा दाखल करून प्रकरणाचा तपास सुरू केला आहे.