भाजपचे आमदार सुरेश धस यांचा लाडका खोक्याभाई उर्फ सतीश भोसलेच्या घरावर वन विभागाने धाड टाकली. या धाडीत शिकारीचे मोठे साहित्य सापडल्याने खळबळ उडाली आहे.
शिरूर तालुक्यातील एका व्यक्तीस अमानुष मारहाण करतानाचा व्हिडीओ व्हायरल झाल्यानंतर आमदार सुरेश धस यांचा हा लाडका कार्यकर्ता प्रकाशझोतात आला. दहशतीपोटी कोणीही तक्रार देण्यास धजावत नसल्यामुळे पोलिसांनीच स्वतः फिर्याद दिली. त्यानंतर या खोक्याभाईवर गुन्हा नोंदवण्यात आला. त्यानंतर लगेचच या खोक्याभाईचा दिलीप ढाकणे आणि महेश ढाकणे यांना मारहाण करतानाचा व्हिडीओ व्हायरल झाला. दरम्यान, हा खोक्याभाई हरीण, काळवीट, ससे, मोरांची शिकार करण्यात पारंगत असल्याचा आरोप वन्यजीवप्रेमींनी केला. आज या खोक्याभाईच्या घरावर वन विभागाने धाड टाकली. खोक्याभाईच्या घरावर टाकलेल्या धाडीत वन विभागाला शिकारीचे मोठे साहित्य सापडल्याचे सांगण्यात आले. धारदार शस्त्र, वन्यजीव पकडण्याच्या जाळ्या, वाघूर आदींचा यात समावेश आहे. शिकार केलेल्या प्राण्यांचे वाळलेले मांसही आढळून आले. जिल्हा वन अधिकारी अमोल गर्कळ यांच्या मार्गदर्शनाखाली ४० अधिकारी आणि कर्मचाऱ्यांनी ही धाड टाकली होती.
.jpeg)
Comment List