Chandrapur News – बसस्थानकात महिलांची सुरक्षा वाऱ्यावर, पोलीस चौकीला कुलूप

पुण्यात स्वारगेट बस डेपोमध्ये 26 वर्षीय तरुणीवर शिवशाही बसमध्ये झालेल्या अत्याचाराच्या घटनेमुळे महिलांच्या सुरक्षेचा गंभीर प्रश्न उपस्थित झाला आहे. त्यामुळे राज्यभरातील बसस्थानकांवरील महिलांच्या सुरक्षेसंदर्भात आढावा घेण्यास सुरुवात झाली आहे. अशातच नवीनच बांधण्यात आलेल्या चंद्रपूर बसस्थानकाची सुरक्षा नावालाच असल्याची धक्कादायक बाब उघडकीस आली आहे. बसस्थानकात असलेल्या पोलीस चौकीलाही कोणी वाली नाही. कारण पोलीस चौकीला सतत कुलूप लागलेले असते.

पुण्यातील स्वारगेट बसस्थानकातील शिवशाही बसमध्ये एका युवतीवरील अत्याचाराच्या लांच्छनास्पद घटनेनंतर चंद्रपूर येथील मुख्य बसस्थानकाचा आढावा घेतला असता सुरक्षा व्यवस्था वाऱ्यावरच असल्याचे धक्कादायक वास्तव पुढे आले. चंद्रपूरचे बसस्थानक नवे करकरीत आहे. विधानसभा निवडणुकीपूर्वी त्याचे उद्घाटन झाले. त्यामुळे भौतिक सुविधा बसस्थानकावर बऱ्यापैकी आहेत. हिरकणी कक्ष, स्वच्छतागृहाची अवस्था वाईट आहे. या परिसरात एक पोलीस चौकी असून, ती नेहमी बंद असते. पोलीस नावाची गोष्ट याठिकाणी बघायला मिळत नाही. पुण्यात घडलेल्या घटनेनंतर प्रशासन अलर्ट मोडवर आले असून, आता वरिष्ठांकडून बसस्थानकांतील सुरक्षेची मागणी केली जाणार आहे. चंद्रपूर बसस्थानकावर सीसीटीव्ही आहेत. मात्र सीसीटीव्ही मॉनिटरिंगसाठी एकही कर्मचारी नाही. गर्दीच्या तुलनेत केवळ आठ सीसीटीव्ही असून, ते अपुरे पडत आहेत. रात्री मुक्कामी असणाऱ्या बसेस प्रतिबंधित क्षेत्रातील आगारातच असतात. पहाटेच्या गाड्यांसाठी 10 ते 15 कर्मचारी मुक्कामी असतात. आगार व्यवस्थापकाने पोलीस चौकी सुरू करण्यासंदर्भात पत्र व्यवहार केला, मात्र ती सुरू होऊ शकलेली नाही. त्यामुळे सर्वसामान्य प्रवाशांनी सुरक्षेसाठी कुणाकडे बघायचे, असा प्रश्न या निमित्ताने उपस्थित झालाय.