गुलालाची मुक्त उधळण अन् ढोल-ताशांच्या निनादावर भक्तांचा जल्लोष याबरोबरच ‘भैरीच्या नावानं चांगभलं’चा गजर… अशा भक्तिमय वातावरणात सीमाभागातील लाखो भाविकांचे श्रद्धास्थान व गडहिंग्लजचे ग्रामदैवत श्री काळभैरव देवाचा पालखी सोहळा आज सायंकाळी अलोट गर्दी आणि जल्लोषात पार पडला. मिरवणुकीने पालखी डोंगरावरील मंदिराकडे रवाना झाली. उद्या (शुक्रवार, दि. 14) यात्रेचा मुख्य दिवस आहे.
गडहिंग्लज शहरातील शिवाजी चौकातील श्री काळभैरव मंदिरात पुजारी, मानकरी, प्रशासकीय अधिकारी व असंख्य भक्तांच्या उपस्थितीत पालखीचे पूजन करण्यात आले. त्यानंतर पालखी मिरवणूक सुरू झाली. आकर्षक फुलांनी पालखी सजविण्यात आली होती. पालखीसमोरील सासनकाठ्यांना गोंडे बांधण्यासाठी भाविकांनी मोठी गर्दी केली होती. मोठ्या गोंड्यांनी सर्वांचे लक्ष वेधून घेतले. श्री काळभैरवाच्या भक्तीत तल्लीन होऊन गुलालाच्या उधळणीत आबालवृद्धांनी केलेला जल्लोष पाहण्यासारखा होता. पालखी शिवाजी चौकातून, नेहरू चौक, बाजारपेठ, वीरशैव चौकातून काळभैरी रोडवरून डोंगरावरील मंदिराकडे रवाना झाली. रात्री बारा वाजता श्री काळभैरव देवाची शासकीय पूजा झाली. पहाटे काकड आरती झाल्यानंतर मंदिर भाविकांसाठी खुले करण्यात आले.
आज यात्रेचा मुख्य दिवस
■ शुक्रवार (दि. 14) यात्रेचा मुख्य दिवस आहे. या यात्रेसाठी महाराष्ट्र, कर्नाटक, गोवा या भागातून लाखो भाविक गर्दी करतात. सर्व भाविकांना सुलभ दर्शन होण्यासाठी प्रशासनाने योग्य पद्धतीने नियोजन केले आहे. यात्रास्थळी जाण्यासाठी गडहिंग्लज आगाराने जादा बस गाड्यांची व्यवस्था केलेली आहे. प्रशासनाबरोबरच विविध पक्ष संघटनांनीदेखील भाविकांची कोणत्याही प्रकारची गैरसोय होऊ नये यासाठी सज्ज आहेत.
.jpeg)
Comment List