U-19 Women’s T20 World Cup – हिंदुस्थानच्या युवती विजेतेपदाच्या एक पाऊल दुर, इंग्लंडला धुळ चारल्यानंतर आता लढत दक्षिण आफ्रिकेशी

हिंदुस्थानच्या युवतींनी जबरदस्त प्रदर्शन करत 19 वर्षाखालील युवतींच्या टी-20 विश्वचषक फायनलमध्ये प्रवेश केला आहे. उंपात्य फेरीत टीम इंडियाने इंग्लंडला 9 विकेटने धुळ चारली आहे. इंग्लंडने दिलेले 114 धावांचे आव्हान टीम इंडियाने 1 विकेट गमावत पूर्ण केले आणि अंतिम सामन्यात प्रवेश केला. टीम इंडियाची अंतिम लढत 2 फेब्रुवारी रोजी दक्षिण आफ्रिकेविरुद्ध होणार आहे. टीम इंडियाला सलग दुसऱ्यांचा विजेतेपद पटकावण्याची संधी आहे. 2023 झालेल्या पहिल्या हंगामात टीम इंडियाने विजेतेपद पटकावले होते.

इंग्लंडच्या संघाने नाणेफेक जिंकत प्रथम फलंदाजी करण्याचा निर्णय घेतला होता. इंग्लंडला प्रथम फलंदाजी करताना 8 गड्यांच्या मोबदल्यात 113 धावांपर्यंतच मजल मारता आली. टीम इंडियाच्या गोलंदाजांनी धारधार गोलंदाजी करत इंग्लंडच्या फलंदाजांना झटपट बाद केले. परुणिका सिसोदिया आणि वैष्णवी शर्माने 3-3 विकेट घेतल्या तर, आयुषी शुक्लाने दोन विकेट घेतल्या. विशेष म्हणजे इंग्लंडच्या आठ फलंदाजांना फिरकीपटूंनी आपल्या फिरकीच्या जाळ्यात अडकवले.

इंग्लंडने दिलेले 114 धावांचे आव्हान टीम इंडियाने 1 विकेट गमावत पूर्ण केले. सलामीला आलेल्या गोंगजी त्रिशा आणि जी. कमालिनीने धमाकेदार फटकेबाजी करत 9 षटकात 60 धावा चोपून काढल्या. त्रिशाने 29 चेंडूंमध्ये 35 आणि कमालिनीने 50 चेंडूंमध्ये नाबाद 56 धावांची खेळी करत संघाला विजय मिळवून दिला. तसेच सानिका चाळकेने 11 धावांचे योगदान दिले. टीम इंडियाने हा सामना जिंकत फायनलमध्ये धडक मारली आहे. टीम इंडियाचा अंतिम सामना 2 फेब्रुवारी रोजी दक्षिण आफ्रिकेविरुद्ध होणार आहे.