…अन्यथा आम्ही आंदोलनाची पुढील दिशा ठरवू; मनोज जरांगे यांचा मुख्यमंत्र्यांना अल्टीमेटम

मराठा आंदोलक मनोज जरांगे पुन्हा एखदा मराठा आरक्षणाच्या मागणीसाठी उपोषणाला बसले आहेत. बुधवारी त्यांचा उपोषणाचा पाचवा दिवस आहे. जरांगे यांनी बुधवारी पत्रकार परिषद घेत मुख्यमंत्र्यांना आज संध्याकाळपर्यंतचा अल्टीमेटम दिला आहे. आमच्या मागण्या पूर्ण करणार आहात की नाही, ते त्यांनी सांगाने, अन्यथा आम्ही आंदोलनाची पुढील दिशा ठरवू, असा इशाराही जरांगे यांनी मुख्यमंत्र्यांना दिला आहे.

सरकार आमच्या मागण्या पूर्ण करणार आहेत की नाही हे त्यांनी सांगावं. अनेक लोक उपोषणाला बसले आहेत आम्ही ज्या मागण्या केल्यात त्या पूर्ण करणार की नाही? हे सांगावं, म्हणजे आम्ही आमच्या आंदोलनाची पुढील दिशा ठरवू. आज 5 दिवस उलटूनही मुख्यमंत्र्यांनी काही निर्णय घेतला नाही. मराठी आरक्षण देणार की नाही, हे मुख्यमंत्र्यांनी सांगावं. मी माझ्या मतावर ठाम आहे. त्यामुळे त्यांनी हो किंवा नाही म्हणून सांगावे, म्हणजे आम्हाला पुढील दिशा ठरवता येईल, असा इशाराही जरांगे पाटील यांनी मुख्यमंत्री आणि सरकारला दिला आहे.

आमच्या सोबत बेइमानी केली तर पाच वर्ष नीट सत्ता चालू देणार नाही. त्यामुळे सरकारने स्पष्ट सांगून टाकावे, आरक्षण देणार आहेत की नाही. मुख्यमंत्र्यांनी आज संध्याकाळपर्यंत संगावे. तुम्ही मराठ्यांना सुखाने खाऊ दिले नाही तर तुम्हाला 5 वर्ष सुखाने सत्ता करू देणार नाहीत. त्यामुळे तोंड लपवू नका, मराठ्यांचा विरोधक कोण आहे हे आम्हाला कळणे गरजेचे आहे, असे ही मनोज जरांगे पाटील म्हणाले. आता जरांगे पाटील यांनी मुख्यमंत्र्यांना आपल्या मागण्यांबाबत निर्णय घेण्यासाठी आज संध्याकाळपर्यंतचा वेळ देत पुन्हा एकदा अल्टीमेटम दिला आहे.