तोकडे कपडे घातल्यास सिद्धिविनायक मंदिरात प्रवेशबंदी

मुंबईकरांचे आराध्य दैवत असलेल्या प्रभादेवी येथील श्री सिद्धिविनायक मंदिरात दर्शनासाठी येणाऱया भक्तांसाठी आता ड्रेसकोड लागू करण्यात आला आहे. मंदिरात येणाऱया भक्ताचा पेहराव हा पावित्र्य जपणारा असावा. तोकडे कपडे घालून आलेल्या भाविकांना मंदिरात प्रवेश दिला जाणार नाही, अशी माहिती आज श्री सिद्धिविनायक गणपती मंदिर न्यासाकडून प्रसिद्धिपत्रकाद्वारे देण्यात आली.

प्रभादेवी येथील श्री सिद्धिविनायक मंदिरात दर्शनासाठी मुंबईसह देशाच्या कानाकोपऱयातून भाविक येतात. माघी गणेश जयंतीनिमित्त श्री सिद्धिविनायक मंदिरात विविध कार्यक्रमांचे आयोजन करण्यात आले आहे. त्या पार्श्वभूमीवर ट्रस्टच्या सदस्यांची बैठक झाली आणि त्यामध्येच एकमताने ड्रेसकोडबाबत निर्णय घेण्यात आला आहे. सिद्धिविनायक मंदिरात श्रींच्या दर्शनासाठी येणाऱया भाविकांनी शालिनता जपणारा व मंदिराचे पावित्र्य राखले जाईल असा पेहराव करून दर्शनासाठी यावे. जो पेहराव कराल तो दुसऱयाला संकोच वाटणारा नसावा,असे ट्रस्टच्या वतीने स्पष्ट करण्यात आले आहे.

प्रसादासाठी आता कागदी पाऊच

श्री सिद्धिविनायक मंदिरातील प्रसादासाठी वापरण्यात येणारे प्लॅस्टिक पाऊच बंद करण्यात येणार आहेत. त्याऐवजी पर्यावरणपूरक कागदी पाऊचचा वापर प्रायोगिक तत्त्वावर सुरू करण्याचा निर्णयदेखील ट्रस्टच्या वतीने घेण्यात आला आहे.

– फाटकी जिन्स, स्कर्ट अथवा अंगप्रदर्शन करणारे ड्रेस परिधान केल्यास मंदिरात प्रवेश दिला जाणार नाही.