अजबच! वाघाच्या मूत्राची वाढली मागणी, ‘या’ आजारांवर रामबाण असल्याच्या दाव्याने चीनमध्ये खळबळ

चीनच्या अनोख्या खाण्यापिण्याच्या सवयी सर्वांनाच परिचित आहे. मात्र आता तर चीनने कहरच केला आहे. संधिवातासारख्या आजारांवर वाघाचे मूत्र रामबाण असल्याचा दावा केला आहे. आता तर संधीवात बरा करण्यासाठी वाघाच्या मूत्राचा वापर केला जात असून चीनच्या बाजारात वाघाचे मूत्र बाटल्यांमध्ये भरुन बक्कळ किमतीला विकले जात आहे.

नैऋत्य चीनच्या सिचुआन प्रांतातील प्राणीसंग्रहालय संधिवात उपचार म्हणून वाघाचे मूत्र विकत आहे. ‘याआन बिफेंगक्सिया वन्यजीव प्राणीसंग्रहालय’ असे या प्राणीसंग्रहालयाचे नाव आहे. हे प्राणीसंग्रहालय पर्यटकांना सायबेरीयन वाघाचे मूत्र विकून संधिवात आणि स्नायूंच्या दुखण्यावर रामबाण उपाय असल्याचा दावा करत आहे.

साऊथ चायना मॉर्निंग पोस्टच्या वृत्तानुसार, वाघाच्या मूत्राच्या बाटल्या तब्बल 50 युआन म्हणजेच 600 रुपयांना विकल्या जात आहेत. एका बाटलीत अडीचशे ग्रॅम मूत्र असते. संधिवात आणि स्नायूंच्या वेदनेवर हे मूत्र लावण्याबाबत प्राणीसंग्रहालयाकडून काही सूचनाही दिल्या आहेत. स्थायूंना वेदना होत असल्यास वाघाच्या मूत्रात व्हाईट वाईन आणि आल्याचा तुकडा मिक्स करुन त्यावर लावावा. एवढेच नाही तर प्राणीसंग्रहालयाकडून वाघाचे मूत्र प्यायल्यानेही अनेक आजार बरे होत असल्याचे सांगण्यात आले. मात्र कोणत्याही प्रकारची अॅलर्जी असल्यास हे मुत्र पिऊ नये असेही सांगण्यात आले आहे.

प्राणी संग्रहालयाच्या एका कर्मचाऱ्याने दिलेल्या माहितीनुसार, वाघाने मूत्र केल्यानंतर ते एका भांड्यात एकत्र केले जाते. मात्र ते किटाणूरहीत केले जाते की नाही याबाबत काहीच स्पष्ट केलेले नाही. अनेक आजारांवर वाघाचे मूत्र रामबाण ठरत असल्याच्या बातमीने चीनमध्ये खळबळ उडाली आहे. अनेक डॉक्टरांनी याला विरोध केला आहे. अशाप्रकारच्या उपचारांना प्रोत्साहन देणे म्हणजे अनेक धोके निर्माण झाल्याचे डॉक्टरांचे म्हणणे आहे.