गुरमीत राम रहीम 12 व्यांदा पॅरोलवर सुटला, कडक सुरक्षेत तुरुंगातून गुपचूप बाहेर काढलं!

बलात्कार आणि हत्येप्रकरणी दोषी ठरलेला डेरा सच्चा सौदाचा प्रमुख गुरमीत राम रहीम सिंग याला पुन्हा एकदा 30 दिवसांचा पॅरोल मंजूर करण्यात आला आहे. हा 12 व्यांदा पॅरोलवर सुटला आहे. पॅरोल मिळाल्यानंतर मंगळवारी पहाटे 5 वाजून 26 मिनीटांनी त्याला गुपचूप बाहेर काढण्यात आले. तो सिरसा येथील आश्रमात राहणार असल्याचे बोलले जात आहे.

रोहतकच्या सुनारिया तुरुंगात शिक्षा भोगत असलेला राम रहीम गुरमीत सिंग याला पुन्हा एकदा 30 दिवसांचा पॅरोल मिळाला आहे. त्याला कडक सुरक्षा व्यवस्थेत बाहेर काढण्यात आले आहे. यावेळी राम रहीमच्या विश्वासातील सहकारी हनीप्रीत स्वतः दोन वाहनांसह डेरा प्रमुख राम रहीमला घेण्यासाठी आली होती. शिक्षा मंजूर झाल्यापासून पहिल्यांदाच सिरसा येथील आश्रमात राहण्याची त्याला परवानगी देण्यात आली आहे. 2017 साली शिक्षा सुनावल्यानंतर 8 वर्षे तो डेराच्या आश्रमात जाऊ शकला नाही. सिरसा येथील आश्रमात पोहोचल्यानंतर त्याने आपल्या अनुयायांना सिरसा धाम येथे न येण्याचे आवाहन केले आहे. यापूर्वी 2024 मध्येही राम रहीमने इमर्जन्सी पॅरोल मागितला होता. निवडणूक आयोगाने 30 सप्टेंबर रोजी तीन अटींसह त्यांचा पॅरोल मंजूर केला होता. राम रहीम हरयाणाला भेट देऊ शकत नाही किंवा सोशल मीडियावरील कोणत्याही निवडणूक कार्यक्रमात सहभागी होऊ शकत नाही, अशी अट होती.

25 ऑगस्ट 2017 रोजी पंचकुलामध्ये झालेल्या हिंसाचारानंतर गुरमीत राम रहीमला सुनारिया तुरुंगात आणण्यात आले होते. दोन साध्वींचे लैंगीक शोषण केल्याप्रकरणी राम रहीमला प्रत्येकी 10 वर्षांची शिक्षा सुनावण्यात आली आहे. यानंतर गुरमीत राम रहीमला पत्रकार हत्या आणि डेरा माजी व्यवस्थापक रणजीत सिंग याच्या हत्येप्रकरणी जन्मठेपेची शिक्षा सुनावण्यात आली होती. मात्र, पंजाब-हरयाणा न्यायालयाने रणजीत हत्या प्रकरणातून त्यांची निर्दोष मुक्तता केली.