शरद पवारांच्या तब्येतीसंदर्भात महत्त्वाची अपडेट; सुप्रिया सुळेंनी दिली प्रकृतीत सुधारणेची माहिती

राष्ट्रवादी काँग्रेस शरदचंद्र पवार पक्षाच्या नेत्या आणि खासदार सुप्रिया सुळे यांनी आज मुंबईत माध्यमांशी संवाद साधला. यावेळी सुप्रिया सुळे यांनी राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्या प्रकृतीची माहिती दिली. शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी फोन करून शरद पवार यांच्या प्रकृतीची विचारपूस केली, असे सुप्रिया सुळे म्हणाल्या.

सगळ्यांचे आशीर्वाद, प्रेम आणि शुभेच्छामुळे कालच्यापेक्षा आज पवारसाहेबांची तब्येत खूप बरी आहे. डॉक्टरांनी त्यांना तीन-चार दिवस आराम करायला सांगितला आहे. त्यांना घरी राहणं फारसं प्रिय नाही. त्यामुळे उद्धजी अनेक वेळा चिडवतात की, तुम्ही घरी त्यांना फारच त्रास देता म्हणून ते सारखे दौरे करत असतात. कालच उद्धवजींचा फोन आला होता आणि त्यांनी मला सांगितलं चार दिवस आता त्यांना (शरद पवारसाहेब) घरात बांधून ठेवाच म्हणाले, असे सुप्रिया सुळे यांनी सांगितले.

आता पवारसाहेबांची प्रकृती चांगली आहे. डॉक्टरांच्या देखरेखीखाली आहेत. त्यांना चेस्ट कन्जेशन आणि खोकला झाला आहे. तरीही ते दौरे करत होते. मुंबईत ते आहेत. काल त्यांच्या चाचण्याही केल्या. सर्वांच्या शुभेच्छांमुळे त्यांची प्रकृती आता उत्तम आहे. खूप लोकांनी शुभेच्छांसाठी फोन केले. आम्ही कोणाला सांगितलं नव्हतं. पण दौरे रद्द झाल्याने बाहेर सगळ्यांना कळलं. लोकांनी ज्या शुभेच्छा दिल्या त्याबद्दल सर्वांचे आभार, असे सुप्रिया सुळे म्हणाल्या.