Kolkata Rape Case – प्रशिक्षणार्थी महिला डॉक्टर बलात्कार प्रकरणी संजय रॉयला जन्मठेप

देशाला हादरवून सोडणाऱ्या कोलकाता येथील आरजी कर मेडिकल कॉलेजमधील डॉक्टरचा बलात्कार आणि हत्या प्रकरणाचा अखेर निकाल लागला आहे. या प्रकरणातील मुख्य आरोपी संजय रॉयला पश्चिम बंगालच्या सियादलाह न्यायालयाने जन्मठेपेची शिक्षा सुनावली आहे. त्याचबरोबर 50,000 रुपयांचा दंडही ठोठावण्यात आला आहे.

प्रशिक्षणार्थी महिला डॉक्टरवरील बलात्कार व हत्येसाठी आरोपी संजय रॉयला 18 जानेवारी रोजी बीएनएसच्या कलम 64, 66 आणि 103 (1) अंतर्गत दोषी ठरवण्यात आले होते. मागील वर्षी 9 ऑगस्टला ही धक्कादायक घटना घडली. 10 ऑगस्टला रॉयला अटक झाली. कोलकाता येथील आरजी कर मेडिकल कॉलेज व हॉस्पिटलमधील सेमिनार हॉलमध्ये 31 वर्षीय निवासी महिला डॉक्टरचा मृतदेह आढळला. त्यानंतर देशभर एकच खळबळ उडाली होती. हॉस्पिटल प्रशासनाने सुरुवातीला बलात्काराची शक्यता नाकारली. परंतु नंतर शवविच्छेदनात बलात्कार झाल्याचे स्पष्ट झाले.

या खटल्याचे कामकाज 57 दिवसांमध्ये पूर्ण झाले आहे. विशेष म्हणजे याची सुनावणी इन-कॅमेरा झाली. सुरुवातीला या घटनेचा तपास स्थानिक पोलीस करत होते. नंतर सीबीआयकडे याचा तपास वर्ग करण्यात आला. सीबीआयने आरोपपत्र दाखल केल्यानंतर 12 नोव्हेंबर 2024 रोजी याची सुनावणी सुरू झाली. 9 जानेवारी 2025 रोजी साक्षी पुरावे नोंदवण्याचे काम पूर्ण झाले.