मुंबई महापालिकेवर भगवा डौलाने फडकवा! शिवसेना नेते अनिल परब यांचे गटप्रमुखांना आवाहन

शिवसेना ही नुसती निवडणुकीसाठी कार्य करणारी संघटना नसून 365 दिवस जनतेच्या प्रश्नांसाठी राबणारी संघटना आहे. मतदारांच्या सुखदुःखात तसेच त्याच्या अडचणींसाठी गटप्रमुख हा सदैव तत्पर असतो. त्यामुळे शिवसेनेचे गटप्रमुखच मुंबई महापालिकेवर भगवा डौलाने फडकवतील, असा विश्वास शिवसेना नेते आमदार अनिल परब यांनी व्यक्त केला.

शिवसेना विभाग 1 मधील पुरुष व महिला गटप्रमुखांचा भव्य मेळावा मागाठणे येथील स्वर्गीय अनंतराव भोसले मैदानात आयोजित करण्यात आला होता. त्यावेळी ते बोलत होते. ते म्हणाले, मुंबईमध्ये बाळासाहेबांचे विचार मानणारा मतदारांचा एक मोठा वर्ग आहे. शिवसेना पक्षप्रमुख उद्धव ठाकरे यांनी मुख्यमंत्री असताना केलेले काम व शिवसेना नेते आदित्य ठाकरे यांचा तरुणांमध्ये असलेला प्रभाव आणि मतदार या जोरावर शिवसेनेला आगामी मुंबई महापालिका निवडणुकीमध्ये चांगलेच यश मिळेल, असा विश्वासही त्यांनी व्यक्त केला. मेळाव्याचे आयोजन शिवसेना विभागप्रमुख उदेश पाटेकर आणि विभाग संघटक सुजाता शिंगाडे यांनी केले होते. मेळावा यशस्वी होण्यासाठी सहकार्य करणारे नंदकुमार मोरे यांचा यावेळी सत्कार करण्यात आला.

पदवीधर, सिनेट निवडणुकीप्रमाणे काम करा!

मुंबई महापालिकेची निवडणूक ही फक्त एका प्रभागापुरती मर्यादित असते. त्या प्रभागातील गटप्रमुखांचा मतदारांबरोबर चांगला संपर्प असतो. ज्याप्रमाणे पदवीधर व सिनेट निवडणुकीत गटप्रमुखांनी प्रत्येकी 10 ते 20 मतदारांची जबाबदारी घेऊन विजय मिळवून दिला. त्याचप्रमाणे आता यादीनिहाय 300 ते 400 मतदारांपर्यंत पोहोचावे, असे आवाहनही परब यांनी केले.

पोलिंग एजंट आताच तयार करा!

शिवसेना उपनेते विश्वनाथ नेरुरकर यांनी गटप्रमुखांच्या जबाबदाऱयांची जाणीव करून दिली तसेच गटप्रमुखांनी आपल्या यादीतील पोलिंग एजंट आतापासून तयार करावेत, जेणेकरून निवडणुकीच्या वेळेस धावपळ होणार नाही व मतदानाच्या वेळी मतदारांना ओळखू शकतील, असे सांगितले.

सदस्य नोंदणीवर भर द्यावा!

गटप्रमुखांनी शिवसेना सदस्य नोंदणीत जास्तीत जास्त भर द्यावा. शिवसेना ही कार्यकर्त्यांची संघटना असून आजपर्यंत शिवसेनेतील अनेक उपशाखाप्रमुख, गटप्रमुख व शाखाप्रमुख हे नगरसेवक व आमदार पदापर्यंत पोहोचले आहेत, असे शिवसेना उपनेते विनोद घोसाळकर म्हणाले.

आधीपेक्षा जास्त जागा जिंकू

मुंबईत सध्या मराठी माणसांवर वारंवार अन्याय होत असताना आपण पाहत आहोत. परंतु मराठी माणसांच्या अन्यायावर वाचा पह्डणारी एकच संघटना ही शिवसेना आहे, हा विश्वास मुंबईकरांना आहे. त्यामुळे सर्व गटप्रमुखांनी जोमाने कामाला लागावे. मागील महापालिका निवडणुकीत विभाग क्रमांक 1 मध्ये भाजपबरोबर युती नसतानाही 20 पैकी 10 नगरसेवक शिवसेनेचे निवडून आले होते. या निवडणुकीत 12 ते 14 जागांवर शिवसेना विजय मिळवेल, असा विश्वास माजी आमदार विलास पोतनीस यांनी व्यक्त केला.