दक्षिण-मध्य मुंबईत सांस्कृतिक, कला व खेळ महोत्सव 

कला, क्रीडाप्रेमींना प्रोत्साहन मिळावे तसेच उदयोन्मुख तरुणांना चांगली संधी मिळावी या हेतूने याही वर्षी दक्षिण-मध्य मुंबईकरांसाठी शिवसेनेतर्फे 18 जानेवारी ते 16 फेब्रुवारी या कालावधी दरम्यान सांस्कृतिक, कला व खेळ महोत्सवाचे आयोजन करण्यात आले आहे. नुकतेच शिवसेना पक्षप्रमुख उद्धव ठाकरे यांच्या हस्ते सदर महोत्सवाचे माहितीपत्रक आणि बोधचिन्हाचे अनावरण करण्यात आले.

शिवसेना सचिव-खासदार अनिल देसाई यांच्या संकल्पनेतून हा महोत्सव पार पडणार असून हिंदुहृदयसम्राट बाळासाहेब ठाकरे यांच्या जयंतीनिमित्त भव्य चित्रकला स्पर्धेसह क्रिकेट, फुटबॉल, खो-खो, बॅडमिंटन, कुस्ती, टेबल टेनिस, पॅरम, बुद्धिबळ, पंजा, रस्सीखेच, मल्लखांब, योगासने, जिम्नॅस्टिक्स, अ‍ॅक्रोबॅटीक, कबड्डी व दहीहंडी या नावीन्यपूर्ण विविध खेळांचादेखील यात समावेश आहे. दक्षिण-मध्य मुंबई लोकसभा मतदारसंघातील सर्व विधानसभा क्षेत्रांत या स्पर्धांचे आयोजन केले जाणार असून सर्व स्पर्धांकरिता एकूण रुपये 9 लाख 31 हजार रकमेची आकर्षक रोख बक्षिसे ठेवण्यात आलेली आहेत. या महोत्सवात सहभागी होण्यासाठी नाव नोंदणी करणे आवश्यक असून इच्छुक स्पर्धक हा दक्षिण-मध्य मुंबई लोकसभा मतदारसंघातील रहिवाशी असणे अनिवार्य आहे. या महोत्सवात जास्तीत जास्त संख्येने पुरुष-महिला, तरुण-तरुणींनी सहभागी होऊन आपल्या कलागुणांचे प्रदर्शन करावे आणि भरघोस बक्षिसे जिंकावीत, असे आवाहन खासदार अनिल देसाई यांनी केले आहे.