शिवडी किल्ला परिसरातील झोपडीधारकांचे पुनर्वसन करा, शिवसेनेची मुंबई पोर्ट ऑथॉरिटीकडे आग्रही मागणी

शिवडी येथील किल्ल्याच्या सभोवताली वसलेल्या 125 झोपड्यांचे पाडकाम करण्याआधी तेथील रहिवाशांना प्रकल्पग्रस्त म्हणून नोंद करून त्यांचे वेळीच पुनर्वसन करा, अशी आग्रही मागणी शिवसेनेने केली आहे. यासंदर्भात शिवसेना नेते, खासदार अरविंद सावंत यांच्या नेतृत्वाखालील शिष्टमंडळाने सोमवारी मुंबई पोर्ट ऑथॉरिटीचे उपाध्यक्ष आदेश तितरमारे यांची भेट घेऊन निवेदन दिले.

शिवडी किल्ला परिसरात 30 हून अधिक वर्षे राहत असलेल्या झोपडीधारकांना घरे खाली करण्यासाठी नोटीस बजावली आहे. महाराष्ट्र सरकारचा झोपडपट्टी पुनर्वसन कायदा व धोरणानुसार 2000 पूर्वीच्या झोपडय़ा असलेल्या झोपडीधारकांना पात्र रहिवासी ठरवले जाते. अशा रहिवाशांच्या पुनर्वसनासाठी सरकारने झोपडपट्टी पुनर्वसन प्राधिकरण स्थापन केले आहे. असे असताना पुनर्वसनाचा मुद्दा मार्गी लावण्याआधी शिवडी किल्ला परिसरातील रहिवाशांना झोपडय़ा रिकाम्या करण्याच्या नोटिसा बजावल्या. हेरिटेज कमिटीने सादर केलेल्या अहवालावरून मुंबई पोर्ट ऑथॉरिटीने नोटिसा बजावल्या आहेत. या झोपड्यांना प्रकल्पग्रस्त म्हणून नोंद करून एमएमआरडीएमार्फत झोपडीधारकांचे पुनर्वसन करावे. यापूर्वी माहीम किल्ला परिसरातील झोपड्यांबाबत असा निर्णय घेण्यात आला होता याकडे पोर्ट ऑथॉरिटीचे लक्ष वेधण्यात आले. यावेळी नगरसेवक सचिन पडवळ, शाखाप्रमुख बैजू हिंदोळे तसेच झोपडीधारक उपस्थित होते.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.