वाल्मीक कराडला ताब्यात घेतल्यानंतर सीआयडी अधिकाऱ्यांनी दिली मोठी माहिती; वाचा काय म्हणाले…

बीड जिल्ह्यातील केज पोलीस ठाण्यातील देशमुख हत्याप्रकरणात प्रमुख आरोपी असलेला वाल्मीक कराड हा मंगळवारी दुपारी 12.30 वाजण्याच्या सुमारास सीआयडी मुख्यालयात शरण आला आहे. त्याला पुण्यातील सीआयडी पथकाने ताब्यात घेतले आहे. त्याची प्राथमिक चौकशी केल्यानंतर सीआडी पथकासह त्याला पुढील तपासासाठी रवाना करण्यात आले आहे. या प्रकरणाचा तपास करणाऱ्या बीडच्या सीआयडी पथकाच्या अधिकाऱ्यांकडे त्याला सोपवण्यात येणार आहे. त्यानंतर पुढील योग्य ती कार्यवाही करण्यात येणार आहे, अशी माहिती सीआयडी अधिकाऱ्यांनी दिली.

बीडमधील मस्साजोग गावचे संरपंच संतोष देशमुख यांची हत्या केल्या प्रकरणी तसेच पवनचक्की खंडणी प्रकरणी फरार वाल्मीक कराड मंगळवारी सकाळी पोलिसांना शरण आला. पाषाण येथील सीआयडीच्या कार्यालयात त्याने आत्मसमर्पण केले. मात्र, तो शरण आल्यावर प्रसारमाध्यमांना गुंगारा देत त्याला मागच्या दाराने दुसऱ्या ठिकाणी नेण्यात आले आहे. त्याला सीआयडी ऑफीसमधून बाहेर काढल्याची माहितीही मिडीयाला देण्यात आली नाही. मात्र, त्यानंतर सीआयडी अधिकाऱ्यांनी प्रसारमाध्यमांना याबाबतची माहिती दिली.

मागील काही दिवसांपासून सीआयडीची 13 वेगवेगळी पथके कराडच्या मागावर होती. बीड जिल्ह्यातील मस्साजोग (ता. केज) येथील सरपंच संतोष देशमुख यांच्या हत्येच्या अनुषंगाने वाल्मीक कराड, सुदर्शन घुलेसह चार फरार आरोपींच्या शोधासाठी सीआयडीची नऊ पथके आणि 150 पेक्षा जास्त अधिकारी, कर्मचारी नियुक्त केले आहेत. वाल्मीक कराडच्या शोधासाठी सीआयडीचे पथक शोधाशोध करत होते. मात्र, कराड सापडला नाही. अखेर मंगळवारी कराड हा स्वतः पोलिसांना शरण आला.

वाल्मीक कराडला सीआयडी पथकाने ताब्यात घेतल्यानंतर मुख्यमंत्री देवेंद्र फडणवीस यांनी प्रतिक्रिया दिली आहे. राज्यात गुंडांचे राज्य चालू देणार नाही. या प्रकरणातील दोषींना फासावर लटकवणारच, असे फडणवीस म्हणाले.