सरपंच संतोष देशमुख हत्येतील गुन्हेगारांना कठोर शिक्षा करा! बाळासाहेब थोरात यांनी मस्साजोगमधील देशमुख कुटुंबीयांची घेतली भेट

बीड जिल्ह्यातील मस्साजोग येथील सरपंच संतोष देशमुख यांची झालेली हत्या ही महाराष्ट्राला हादरवणारी घटना आहे. या हत्येमागील सूत्रधाराला कठोरात कठोर शिक्षा झाली पाहिजे, अशी मागणी माजी मंत्री बाळासाहेब थोरात यांनी केली.

बीड जिल्ह्यातील संतोष देशमुख यांच्या कुटुंबीयांची मस्साजोग येथे जाऊन काँग्रेसच्या राष्ट्रीय वर्किंग कमिटीचे सदस्य बाळासाहेब थोरात यांनी भेट घेतली. यावेळी माजी मंत्री, आमदार अमित देशमुख उपस्थित होते.

थोरात म्हणाले, ‘सरपंच संतोष देशमुख यांची हत्या ही अत्यंत वेदनादायी आणि संपूर्ण महाराष्ट्राला हादरवणारी आहे. संतोष देशमुख यांच्या हत्येमागील गुन्हेगारांना त्वरित शोधून कठोरात कठोर शिक्षा झाली पाहिजे. बीड जिल्ह्यासह राज्यात दहशत वाढवण्यासाठी कारणीभूत कोण आहे आणि यामागील खरा मास्टरमाइंड कोण आहे, याची सखोल चौकशी व्हायला पाहिजे. गुन्हेगारांना जात-धर्म काही नसून, या प्रकरणाची न्यायालयीन चौकशी व्हावी व फास्ट ट्रॅक कोर्टात सुनावणी करून दोषींना कठोर शिक्षा द्यावी, अशी मागणी त्यांनी केली. सरपंच देशमुख यांच्या कुटुंबीयांच्या पाठीशी काँग्रेस पक्ष सदैव उभा राहील, असे आश्वासन बाळासाहेब थोरात यांनी दिली.

दरम्यान, परभणी आणि बीड येथील घटना या पुरोगामी महाराष्ट्राच्या इतिहासाला काळिमा फासणाऱ्या आहेत. या दोन्ही ठिकाणच्या गुन्हेगारांना तातडीने अटक करावी व पिढीत कुटुंबांना न्याय द्यावा, अशी मागणी आमदार अमित देशमुख यांनी केली.