…तर मी, माझा पक्ष आपल्यासोबत खांद्याला खांदा लावून उभा राहील! आदित्य ठाकरेंच मुख्यमंत्री फडणवीसांना पत्र

इंग्रजी नववर्ष स्वागताच्या पार्श्वभूमीवर शिवसेना (उद्धव बाळासाहेब ठाकरे), युवासेनाप्रमुख आदित्य ठाकरे यांनी मुख्यमंत्री देवेंद्र फडणवीस यांनी राज्याचे मुख्यमंत्री देवेंद्र फडणवीस यांनी एक पत्र लिहून विनंती केली आहे. पक्षीय भेदभाव आणि विचारसरणी बाजूला ठेवून; नागरिकांना दिलासा देण्यासाठी राजकीय पोस्टर, बॅनर्स आणि होर्डिंग्जवर प्रतिबंध घालून आपण सगळ्यात महत्त्वाचा आणि मोठा निर्णय घेऊ शकता, अशी विनंती आदित्य ठाकरे यांनी देवेंद्र फडणवीस यांना केली आहे. तसेच असा निर्णय घेतल्यास मी, माझा पक्ष आपल्यासोबत खांद्याला खांदा लावून उभा राहील, असं आश्वाशन देखील दिले आहे.

मुख्यमंत्र्यांना लिहिलेल्या आपल्या पत्रात आदित्य ठाकरे म्हणतात, गेल्या दोन वर्षांपासून झालेल्या राजकीय गोंधळामुळे, प्रत्येक शहराच्या कानाकोपऱ्यात हजारो राजकीय पोस्टर (कायदेशीर आणि बेकायदेशीर) पाहायला मिळत आहेत. एक नागरिक म्हणून हे पाहून खेद वाटतो आणि एक व्यक्ती म्हणून शहर विद्रुप करणाऱ्या अशा पोस्टर्सचा त्रास होतो.

आपल्या पत्रात आदित्य ठाकरे यांनी गेल्या काही वर्षात निवडक पोस्टर हटवण्यात आल्याचा उल्लेख केला आहे. ‘गेल्या दोन वर्षांत बीएमसीकडून निवडक पोस्टर हटवण्यात आली, तर सत्ताधारी पक्षाचे पोस्टर मात्र तसेच दिसत आहेत’, असा आरोप आदित्य ठाकरे यांनी केला आहे.

सर्व राजकीय पक्ष आणि सामाजिक संघटनांनी आपल्या शहरांमध्ये राजकीय होर्डिंग लावण्याचे टाळावे, असे आवाहन करण्यास मी मुख्यमंत्री देवेंद्र फडणवीस जी ह्यांना निवेदनाद्वारे विनंती केली आहे.
फडणवीस जी ह्यांनी ‘नो बॅनर’ उपक्रमासाठी पाऊल उचलले, तर आम्ही देखील त्यांना साथ देऊ आणि त्याचे… pic.twitter.com/oU8vKZdgmM

— Aaditya Thackeray (@AUThackeray) December 24, 2024

‘आपण या बालिश राजकीय स्पर्धेला बाजूला ठेवून, सर्व राजकीय पक्षांनी बेकायदेशीर पोस्टर, बॅनर आणि होर्डिंग्ज न लावण्याचा निर्णय घेतला, तर नागरिकांना आपण मोठा दिलासा देऊ शकतो’, असं आदित्य ठाकरे यांनी म्हटलं आहे. ह्यामुळे आपली शहरे स्वच्छ दिसतीलच, शिवाय आपल्या कार्यकर्त्यांनाही अशा खर्चातून दिलासा मिळेल. जगात कुठेही असे राजकीय पोस्टर लावले जात नाहीत, असेही नमूद करायला ते विसरले नाहीत.

‘आपण ह्यादिशेने पहिले पाऊल टाका, आम्हीही तुमच्या पाठीशी आहोत’, असं म्हणत आदित्य ठाकरे यांनी सकारात्मक गोष्टींना आपला पाठिंबा असल्याचं अधोरेखित करतानाच आपण सत्तेत मुख्यमंत्री आणि आम्ही, विरोधी पक्ष म्हणून असलो तरी ह्या गोष्टींवर आपण एकत्र काम केलेच पाहिजे, असंही त्यांनी स्पष्ट केलं आहे. आपण ह्या विषयी बैठक बोलावली किंवा सर्व पक्षांना पत्र लिहिले, तर मी, माझा पक्ष आपल्यासोबत खांद्याला खांदा लावून उभा राहील, असं आदित्य ठाकरे आपल्या पत्रात म्हणतात.