साहित्य संमेलनाच्या तयारीचा आढावा, स्वागताध्यक्ष शरद पवार यांच्याकडून संमेलनस्थळाची पाहणी

98 वे अखिल भारतीय मराठी साहित्य संमेलन येत्या 21 ते 23 फेब्रुवारी 2025 रोजी दिल्लीतील तालकटोरा स्टेडियम येथे होणार आहे. संमेलनाच्या तयारीचा आढावा घेण्यासाठी आज स्वागताध्यक्ष खासदार शरद पवार यांनी संमेलनस्थळाची पाहणी केली.

शरद पवार यांनी संमेलनस्थळावर उपलब्ध असलेल्या सोयासुविधांचा आढावा घेतला. तालकटोरा स्टेडियममध्ये किती लोक येऊ शकतात, त्यांची बसण्याची, राहण्याची आणि जेवणाची व्यवस्था कशी होईल याची पाहणी त्यांनी केली. पुस्तक प्रदर्शन स्थळ, कवीकट्टा आदींची स्थळ पाहणी त्यांनी केली तसेच संमेलन भव्यदिव्य होण्यासाठी आवश्यक सूचनाही त्यांनी यावेळी केल्या.

संमेलनाला देशभरातील नामवंत साहित्यिक तसेच साहित्यप्रेमीही मोठ्या संख्येने उपस्थित राहतील, असा अंदाज आहे. त्या अनुषंगाने सुव्यवस्थित नियोजन आणि सुरक्षेच्या बाबतीत काटेकोर उपाययोजना कराव्यात असेही पवार यांनी यावेळी सांगितले. यावेळी सरहद संस्थेचे संस्थापक अध्यक्ष संजय नहार, डॉ. शैलेश पगारिया, अतुल बोकरीया, प्रदीप पाटील, लेशपाल जवळगे आदी उपस्थित होते.

मराठी साहित्य जागतिक व्यासपीठावर नेऊया

महाराष्ट्र ही सलोख्याची आणि समन्वयाची भूमी आहे. ही ओळख निर्माण होण्यात मराठी वाङ्मयाचा मोठा वाटा आहे. देशाचे वैचारिक प्रतिनिधित्व करण्यात महाराष्ट्राचा आणि मराठी साहित्याचा मोठा वाटा राहिला आहे. यशवंतराव चव्हाण यांच्यासारख्या माणसांनी तर साहित्यात आणि देशाच्या जडणघडणीतही महत्त्वाचे योगदान दिले आहे. देशाच्या राजधानीत संमेलन होत असताना महाराष्ट्राच्या साहित्यिक योगदानाचे स्मरण करून मराठी साहित्याला जागतिक व्यासपीठावर कसे नेता येईल, यादृष्टीने संमेलनाच्या अनुषंगाने प्रयत्न करणार असल्याचे यावेळी शरद पवार यांनी सांगितले.