भाजप खासदार बन्सुरी स्वराज यांना कोर्टाचा दणका, 20 डिसेंबरला न्यायालयात हजर राहण्याचे आदेश

भाजप खासदार बन्सुरी स्वराज यांना दिल्लीच्या राऊस एव्हेन्यू कोर्टाने फौजदारी मानहानीची नोटीस बजावली आहे. त्यांना 20 डिसेंबरला कोर्टामध्ये प्रत्यक्ष किंवा वकिलाच्या माध्यमातून हजर राहण्याचे आदेश दिले आहेत. आम आदमी पक्षाचे नेता, माजी मंत्री आणि आमदार सत्येंद्र जैन यांनी दाखल केलेल्या याचिकेनंतर राऊस एव्हेन्यू कोर्टाने बन्सुरी स्वराज यांना फौजदारी मानहानीची नोटीस बजावली आहे.

सत्येंद्र जैन यांनी बन्सुरी स्वराज यांच्याविरोधात तक्रार दाखल केली होती. त्यांनी केलेल्या तक्रारीनुसार, बन्सुरी स्वराज यांनी 5 ऑक्टोबर 2023 रोजी मुलाखतीदरम्यान सत्येंद्र जैन यांच्याविरोधात अपमानास्पद टिप्पणी केली होती. ही मुलाखत देशातील लाखो लोकांनी पाहिली होती. माझ्या घरातून 3 कोटी रुपयांची रोकड, 1.8 किलोग्राम सोने आणि सोन्याची 133 नाणी जप्त करण्यात आली आहेत, असा खोटा दावा बन्सुरी स्वराज यांनी केल्याचा आरोप सत्येंद्र जैन यांनी केला आहे. या मुलाखतीवरून सत्येंद्र जैन यांनी आरोप केला आहे की, बन्सुरी स्वराज यांनी मुद्दाम मला बदनाम करण्यासाठी आणि त्याचा राजकीय फायदा घेण्यासाठी अशा पद्धतीची टिप्पणी केली आहे. त्यामुळे सत्येंद्र जैन यांनी दाखल केलेल्या याचिकेनंतर दिल्लीच्या राऊस एव्हेन्यू कोर्टाने बन्सुरी स्वराज यांच्याविरोधात फौजदारी मानहानीची नोटीस बजावली असून 20 डिसेंबरला प्रत्यक्ष किंवा वकिलाच्या माध्यमातून कोर्टात हजर राहण्याचे आदेश दिले आहेत.