रात्र गस्त घालत असताना शिर्डी पोलिसांनी 14 लाखांचा गांजा, 12 लाखांचे चारचाकी वाहन व मोबाईल असे एकूण 26 लाख 53 हजारांचा मुद्देमाल जप्त करत गांजामालाची वाहतूक करणाऱ्या व्यक्तीला ताब्यात घेतले, मंगळवारी (10 डिसेंबर) रात्री ही कारवाई करण्यात आल्याची माहिती शिर्डी विभागाचे उपविभागीय अधिकारी शिरीष वमणे यांनी पत्रकार परिषदेत दिली.
अर्जुन कांबळे (वय – 37, रा. निमगाव कोराळे) असे ताब्यात घेतलेल्याचे नाव आहे. पोलीस कर्मचारी बाबासाहेब खेडकर यांनी याबाबत फिर्याद दिली.
शिर्डी परिसरात जिल्हा पोलीसप्रमुख राकेश ओला, अपर पोलीस अधीक्षक वैभव कलबुर्मे व अपर पोलीस अधीक्षक प्रशांत खैरे यांच्या मार्गदर्शनाखाली वेळोवेळी नाकाबंदी केली जाते. त्या अनुषंगाने मंगळवारी रात्री बारा वाजेच्या सुमारास राहाता तालुक्यातील नगर मनमाड रोडवर असलेल्या सावळीविहीर फाटा येथे उपविभागीय अधिकारी शिरीष वमणे यांच्या मार्गदर्शनाखाली पोलीस निरीक्षक रामकृष्ण कुंभार, सहायक पोलीस निरीक्षक रामेश्वर कार्यदे व पोलीस पथकाने नाकाबंदी केली होती. त्यावेळी रात्री साडेबारा वाजता एका राखाडी रंगाच्या इनोव्हा कार (क्र. एमएम 14 बी आर 7871) समृद्धी महामार्गावरून उतरून कोपरगावच्या दिशेने शिडींकडे येत असताना तिची तपासणी करण्यात आली.
कारच्या डिक्कीची तपासणी केली असता, त्यात उग्र वास आल्याने डिक्कीतील पाकिटांची तपासणी केली. 46 पाकिटांत अंदाजे 96 किलो वजनाचा गांजा मिळून आला. सदर गांज्याची किंमत अंदाजे 14 लाख 43 हजार असून, कारची किंमत अंदाजे 12 लाख व दहा हजार रुपये किमतीचा एक मोबाईल असा एकूण 26 लाख 53 हजार 405 रुपयांचा मुद्देमाल जप्त करण्यात आला. तसेच कारचालक अर्जुन कांबळे यास ताब्यात घेण्यात आले.
कांबळे याच्याकडे तो गांजा कुठून
आणला? तो कोठे विक्री करणार होता? आणि त्याला आणखी कोणी साथीदार आहे का? याचा शोध सुरू आहे. या कारवाईत पोलीस कर्मचारी गजानन गायकवाड, गणेश घुले, केवल राजपूत, प्रसाद सूर्यवंशी यांनी सहभाग घेतला.
.jpeg)
Comment List