Border Gavaskar Trophy – गाबा कसोटीत पाऊस विलन ठरणार? टीम इंडियाच्या अडचणी वाढण्याची शक्यता

टीम इंडिया आणि ऑस्ट्रेलिया यांच्यामध्ये सुरू असलेल्या पाच सामन्यांच्या कसोटी मालिकेतील तिसरा कसोटी सामना ब्रिस्बेन येथील गाबा स्टेडियमवर खेळवला जाणारा आहे. 14 डिसेंबर पासून सामन्याला सुरुवात होणार असून टीम इंडिया पराभवाचा वचपा काढण्यासाठी सज्ज झाली आहे. परंतु या सामन्यावर पावसाचे सावट आहे. त्यामुळे टीम इंडियाचे world test championship 2025 च्या फायनलमध्ये पोहचण्याच्या स्वप्नांवर पाणी फेरू शकते.

बॉर्डर गावस्कर करंडकाची टीम इंडियाने अगदी दणक्यात सुरुवात केली. पर्थ येथे पार पडलेल्या पहिल्या कसोटी सामन्यात टीम इंडियाने ऑस्ट्रेलियाचा पराभव करत 1-0 आघाडी घेतली होती. परंतु एडलेड येथे पार पडलेल्या दुसऱ्या कसोटी सामन्यात ऑस्ट्रेलियाने जोरदार पुनरागमन करत टीम इंडियाचा 10 विकेटने पराभव केला आणि मालिकेमध्ये 1-1 अशी बरोबरी साधली. टीम इंडियाला पराभवाचा चांगलाच फटका बसला अन् WTC गुणतालिकेत टीम इंडियाची तिसऱ्या क्रमांकावर घसरण झाली. त्यामुळे टीम इंडियाला तिसरी कसोटी जिंकणे महत्त्वाचे आहे. परंतु या सामन्या दरम्यान पाऊस पडण्याची शक्यता वर्तवण्यात आली आहे.

AccuWeather च्या अहवालानुसार, गाबा स्टेडियमवर पहिल्या दिवशी म्हणजेच 14 डिसेंबरला दिवसाचे तापमान 24 डिग्री सेल्सियसच्या आसपास राहण्याचा अंदाज आहे. तसेच पाऊस पडण्याची 53 टक्के शक्यता आहे. त्यामुळे पहिल्या दिवशी पाऊस पडण्याची जास्त शक्यता आहे. तसेच दुसऱ्या दिवशी 15 डिसेंबरला पाऊस पडण्याची शक्यता 50 टक्क्यांहून कमी आहे. त्यानंतर उरलेले तीन दिवस पाऊस पडण्याची कोणतीही शक्यता वर्तवण्यात आलेली नाही.