प्रती पंढरपूर म्हणून दक्षिण कोकणात ओळखल्या जाणाऱ्या व लाखो भाविकांच्या नवसास पावणाऱ्या आंगणेवाडी येथील श्री भराडी देवीच्या जत्रेची तारीख ठरली आहे. गुरुवारी सकाळी देवाचा कौल घेऊन तारीख निश्चित करण्यात आली. यंदा ही जत्रा 22 फेब्रुवारी 2025 रोजी होणार आहे.
मालवणमधील भराडी देवीचे दर्शन घेण्यासाठी मुंबईसह राज्याच्या कानाकोपऱ्यातून भाविक भराडी देवीच्या दर्शनासाठी येतात. या जत्रेला भाविकांची मोठी गर्दी पाहायला मिळते. विशेष म्हणजे या जत्रेत सामान्य जनासह राजकिय नेतेमंडळी, कलाकारही उपस्थिती लावतात.
आंगणेवाडी जत्रा कोणत्याही तिथीवर अवलंबून नसते. देवीचा कौल घेऊनच जत्रेचा दिवस ठरविण्यात येतो. गुरुवारी सकाळी देवीचा हुकून घेऊन तारीख निश्चित करण्यात आली. यावेळी जत्रोत्सवाला 10 लाखांहून अधिक भाविक येण्याचा अंदाज वर्तवण्यात येत आहे.
आंगणेवाडीत येणारे लाखो भाविक देवीच्या दर्शनाची आस घेऊन येतात. वस्त्रालंकारांनी सजविलेली देवी याची देही याची डोळा पाहून आयुष्याचे सार्थक झाल्याचा अनुभव भाविकांना या ठिकाणी येतो. याच लाखो भाविकांना कोणत्याही प्रकारची गैरसोय न होता आई भराडी मातेचे दर्शन होण्यासाठी आंगणे कुटुंबीय, आंगणेवाडीचे सर्व सदस्य मेहनत घेत असल्याची माहिती मंडळाचे अध्यक्ष छोटू आंगणे यांनी दिली.
आंगणेवाडी जत्रेची तारीख निश्चित झाल्यानंतर रेल्वे तसेच खासगी वाहनांच्या बुकिंगसाठी चढाओढ लागली आहे. प्रथेनुसार देवीला कौल लावून जत्रेची तारीख निश्चित झाली आहे. राजकीय क्षेत्रातील सर्व पक्षिय नेते जत्रेस उपस्थिती दर्शवीत असल्याने ग्रामस्थांबरोबरच शासनाची सुद्धा या जत्रेच्या नियोजनासाठी एक प्रकारची कसोटीच लागते.
जत्रेची तारीख आता जाहीर झाल्याने पूर्व तयारीस लवकरच प्रारंभ होणार आहे. जत्रेच्या तारीख ठरविण्याचा कौल झाल्यानंतर श्री देवी भराडी मंदिर गुरुवारी 12 डिसेंबर ते 14 डिसेंबर असे तीन दिवस धार्मिक विधीसाठी बंद राहणार आहे. मंदिरात कुणालाही प्रवेश दिला जाणार नाही याची भाविकांनी नोंद घेण्याचे आवाहन आंगणे कुटुंबियांनी केले आहे.
.jpeg)
.jpeg)
Comment List