जगदीप धनखड यांच्याविरोधात काँग्रेस राज्यसभेत अविश्वास प्रस्ताव आणणार, समाजवादी पक्ष आणि टीएमसीचा पाठिंबा

संसदेच्या सध्या सुरू असलेल्या हिवाळी अधिवेशनात दोन्ही सभागृहातील तापमान वाढलेलं दिसत आहे. दोन्ही सभागृहात विरोधी पक्ष नेत्यांचा आणि खासदारांचा आवाज दाबण्याचा प्रयत्न सत्ताधाऱ्यांकडून केला जात आहे. याचदरम्यान आता विरोधी पक्ष इंडिया आघाडी राज्यसभेचे अध्यक्ष जगदीप धनखड यांना हटवण्यासाठी अविश्वास प्रस्ताव आणण्याच्या तयारीत आहे. अध्यक्ष जगदीप धनखड यांच्या विरोधात इंडिया आघाडी एकत्र आली असून समाजवादी पक्ष (SP) आणि तृणमूल काँग्रेस (TMC) देखील अविश्वास प्रस्तावाच्या बाजूने असल्याचे सांगितले जात आहे.

काँग्रेस घेऊन येत असलेल्या या अविश्वास ठरावावर टीएमसी आणि सपा खासदारांनीही स्वाक्षरी केल्या आहेत, अशी माहिती मिळत आहे. मिळालेल्या माहितीनुसार, इंडिया आघाडी मंगळवारी राज्यसभेत सभापतींविरोधात अविश्वास प्रस्ताव आणू शकते. अविश्वास प्रस्ताव तयार असून त्यावर 70 सदस्यांनी स्वाक्षरी केल्याचे सांगण्यात येत आहे.

सोमवारी राज्यसभेत जॉर्ज सोरोस यांच्या मुद्द्यावरून झालेल्या गदारोळात अध्यक्ष जगदीप धनखड यांची भूमिका पाहता काँग्रेस त्यांच्याविरोधात अविश्वास प्रस्ताव आणण्याची तयारी करत असल्याचे सांगण्यात येत आहे. जॉर्ज सोरोस यांच्याशी संबंधित मुद्द्यावरून राज्यसभेत सोमवारी ज्याप्रकारे गदारोळ झाला, त्यावरून काँग्रेस आणि इतर विरोधी पक्षांचे सदस्य अध्यक्ष जगदीप धनखड यांच्यावर नाराज असल्याचे सांगितले जात आहे.

दरम्यान, राज्यसभेच्या अध्यक्षांना हटवण्यासाठी प्रस्तावावर 50 सदस्यांच्या स्वाक्षऱ्या आवश्यक आहेत. सभापती धनखड यांच्या विरोधातील ठरावावर 70 सदस्यांनी स्वाक्षरी केल्या आहेत.