माणगावमध्ये नवी मुंबईच्या एकाच कुटुंबातील चौघे बुडाले

कपडे धुण्यासाठी गेलेले चौघेजण पुंडलिका नदीत बुडाल्याची हृदयद्रावक घटना माणगाव तालुक्यातील साजे परिसरात आज घडली. दोघांचे मृतदेह पाण्यातून बाहेर काढण्यात बचाव पथक आणि पोलिसांना यश आले आहे. अन्य दोघांचा शोध रात्री उशिरापर्यंत सुरू होता. पुंडलिका नदीत बुडालेले चौघेही एकाच कुटुंबातील असून ते नवी मुंबईत राहत होते.

नवी मुंबईत वास्तव्य करणारे सिद्धेश सोनार (21), काजल सोनार (26), सिद्धी पेडेकर (16) आणि सोनी सोनार (27) हे आपल्या आजीच्या गावी शिरवली येथे आले होते. हे सर्व जण आज कपडे धुण्यासाठी पुंडलिका नदीवर गेले. त्यांच्यापैकी सिद्धेश पाण्यात पडला. पोहता येत नसल्याने तो गटांगळ्या खाऊ लागला. त्याला वाचवण्यासाठी अन्य तिघांनी पाण्यात उडय़ा मारल्या. त्यांनाही पोहता येत नसल्याने सर्वच जण बुडाले. या घटनेची माहिती मिळताच माणगाव पोलीस व रेस्क्यू टीम घटनास्थळी दाखल झाली. बचाव पथकाने सिद्धेश आणि सिद्धी या दोघांचे मृतदेह पाण्यातून बाहेर काढले आहे. अन्य दोघांचा शोध रात्री उशिरापर्यंत सुरू होता. या दुर्घटनेमुळे शिरवली गावावर शोककळा पसरली आहे.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.