सोलापुरातील हजारो महिलांना कोट्यवधीचा गंडा, पेन्सिल पॅकिंगच्या आमिषाने फसवणूक; अनामत रक्कम घेऊन समूहचालक गायब

जुनी मिल कंपाऊंड येथील दी स्क्वेअर मॉल येथे खुशी महिला गृहउद्योग समूहाच्या माध्यमातून पेन्सिल पॅकिंगचे काम देण्याचे आमिष दाखवून प्रत्येक महिलेकडून 2100 रुपये घेऊन काही महिन्यांतच समूह चालकाने सोलापूर शहरातील सुमारे एक हजार महिलांना दोन ते तीन कोटींचा गंडा घातला. समूहचालक गाशा गुंडाळून फरार झाला आहे. यासंबधी महिलांनी फौजदार चावडी पोलिसांकडे तक्रारी केल्या आहेत.

सोलापूर शहरातील हजारो बेरोजगार महिलांना पॅकिंगचे काम देण्याचे आमिष दाखवून त्यांच्याकडून अनामत रक्कम म्हणून 2100 रुपये घेण्यात आले. पेन्सिल पॅकिंगला दोन हजार रुपये, पेन पॅकिंग दोन हजार रुपये, पापड उद्योग पाच हजार, भडंग पॅकिंग पाच हजार रुपये, मेणबत्ती पॅकिंगला दोन हजार, तर फरसाण आणि चिवडा पॅकिंगला पाच हजार रुपये, मसाला पॅकिंग पाच हजार रुपये, पाणीपुरी पॅकिंग पाच हजार रुपये, टिकली पॅकिंग दोन हजार रुपये, रब्बर पॅकिंग दोन हजार रुपये, अगरबत्ती पॅकिंग 2000, चॉकलेट पॅकिंग 5000 रुपये उद्योग समूहाच्या प्रमुखाने वसूल केले होते.

या बदल्यात एका महिलेला दररोज 200 रुपये वाटप केले जाईल, असे त्याने सांगितले. शहरातील स्थानिक व्यापाऱ्यांकडून माल घेऊन या महिलांना दररोज पॅकिंगला दिला जात होता. त्यांच्या बदल्यात तुम्हाला पैसे मिळतील, असे आश्वासनही दिले होते. महिना पूर्ण झाल्यावर तुमचा हिशेब केला जाईल, असे सांगण्यात आले होते.

अनेक महिला दररोज रांगा लावून

पॅकिंगचा माल घेऊन जात होत्या. एकमेकांच्या ओळखीतून महिला येऊन पैसे भरत होत्या. गेले दोन महिने येथे गर्दी होती. मात्र, गेल्या दोन दिवसांपासून सदर गाळा बंद असल्याने महिलांनी फसवणूक झाल्याची तक्रार केली आहे. पॅकिंग व्यवसाय चालवणारे संस्थाचालक रातोरात गायब झाले आहेत. अनेक महिला भरलेले पैसे घेण्यासाठी हेलपाटे मारत आहेत. मात्र, गाळा बंद असून चालकाने संपर्क नंबरही बंद केला आहे.

महिलांची फसवणूक करणाऱ्या संस्थाचालकाला अटक करून गुन्हा दाखल करावा, अशी मागणी अनेक तक्रारदार महिलांनी केली आहे. खुशी महिला गृहउद्योग पुणे, मोबाईल नं. 9307622076 या नावाने महिलांना पावत्या दिल्या जात होत्या. सुमारे 1 हजारहून अधिक महिलांची अनामत रक्कम घेऊन संस्थाचालक फरार झाला असल्याचे उघडकीस आले आहे.

समूहचालकाचा शोध सुरू

अनेक महिलांनी फौजदार चावडी पोलीस ठाण्यात धाव घेत फसवणूक झाल्याच्या तक्रारी दाखल केल्या आहेत. याप्रकरणी समूहचालकाच्या शोधासाठी पोलीस पथके रवाना करण्यात आली आहेत. तर, पोलीस घटनास्थळावरून माहिती घेत आहेत.