Chandrapur News जिल्हा परिषद शाळेतील पोषण आहारातून विषबाधा, 80 विद्यार्थी रुग्णालयात दाखल

विद्यार्थ्यांना शालेय पोषण आहारातून विषबाधा झाल्याची धक्कादायक घटना सावली तालुक्यातील पारडी गावातील जिल्हा परिषद शाळेत घडली. यात 80 विद्यार्थ्यांना विषबाधा झाली असून आकडा वाढण्याची शक्यता वर्तविली जात आहे. सर्व विषबाधीत विद्यार्थ्यांना सावलीचे ग्रामिण रुग्णालयात भरती करण्यात आले.

पारडी येथील जिल्हा परिषद उच्च प्राथमिक शाळेमध्ये 133 पटसंख्या असुन घटनेच्या दिवशी 126 विद्यार्थी हजर होते. शालेय पोषण आहारामध्ये विद्यार्थ्यांना उखडलेला चणा, तिखट व मिठ लावून दिलेले होते. परंतु दिलेला पोषण आहार निकृष्ट दर्जाचा असल्याने विद्यार्थ्यांना रात्रोच्या वेळेस उलटया, हगवण व ताप येणे सुरु झाले. विद्यार्थी शाळेत आले त्यावेळेसही विद्यार्थी उलटया करीत असल्याने काही विद्यार्थ्यांना सावलीचे ग्रामिण रुग्णालयात भरती करण्यात आले. उपचारादरम्यान विषबाधा झाली असल्याचा संशय व्यक्त करण्यात येत आहे.

सावली येथे तात्काळ आरोग्यसेवा उपलब्ध करुन विद्यार्थ्यांवर उपचार करण्यात येत असले तरी या रुग्णालयात वैद्यकीय अधिकाऱ्यांची पदे रिक्त असल्याने उपचार करण्यास अडचण निर्माण होत आहे.जागेअभावी 25 विद्यार्थ्यांना मुल येथील उप जिल्हा रुग्णालयात भरती करण्यात आले. दोन महिन्यापूर्वी पोषण आहार असल्याने विद्यार्थ्यांना उलटया, हगवण व ताप आल्याची प्राथमिक माहिती आहे. या प्रकरणातील दोषींवर कारवाई करण्याची मागणी पालकांकडून केल्या जात आहे.