… अन् गुलाबी चेंडूंचा वापर सुरू झाला

कसोटी क्रिकेटची ढासळत चाललेली लोकप्रियता आणि प्रेक्षकांमध्ये असलेली उदासिनता दूर करण्यासाठीच कसोटी क्रिकेटमध्ये गुलाबी चेंडूंचा वापर करत डे-नाईट कसोटींचा काळ सुरू झाला. कसोटी क्रिकेटला रंजक बनविण्यासाठी आणि क्रिकेट चाहत्यांची गर्दी वाढावी म्हणून अनेक संघ कसोटी सामने डे-नाईट खेळवत आहेत.

2000 सालात टी-20 क्रिकेटच्या वाढत चाललेल्या लोकप्रियतेने आयसीसीला कसोटी क्रिकेटला रंजक बनवण्यासाठी भाग पाडले. इंग्लिश क्रिकेट मंडळाने 2010 साली कसोटी क्रिकेटमध्ये गुलाबी चेंडू आणण्याचा प्रयत्न केला. त्यांनी बांगलादेशविरुद्ध डे-नाईट कसोटी सामनाही निश्चित केला होता. 2010 साली लॉर्ड्सवर तो कसोटी सामनाही खेळविला जाणार होता. पण या कसोटीपूर्वी दोन्ही देशांनी चार दिवसांत गुलाबी चेंडूची चाचणी घेण्याची मागणी केली आणि हा प्रयोग येथेच थांबला. त्याआधी महिला क्रिकेट आणि प्रथम श्रेणी क्रिकेटमध्ये प्रायोगिक तत्त्वावर गुलाबी चेंडूचा सामना खेळविला गेला होता. त्यामुळे लवकरच लाल आणि पांढऱया चेंडूसह गुलाबी चेंडूही क्रिकेट जगतात येण्याची शक्यता वाढली होती.

अखेर 2015 साली न्यूझीलंड आणि ऑस्ट्रेलिया यांच्यात ऍडलेड ओव्हलवर गुलाबी चेंडूचा वापर करत डे-नाईट सामना खेळविण्यात आला आणि कसोटी क्रिकेटच्या नव्या पर्वाला सुरुवात झाली. त्यानंतर सातत्याने गुलाबी चेंडूत डे-नाईट कसोटी सामने खेळविले जात आहेत आणि या कसोटीला प्रेक्षकही गर्दी करत असल्याचे चित्र दिसतेय.

आतापर्यंत 22 कसोटी सामने डे-नाईट खेळविण्यात आले आहेत. दुसरा कसोटी सामना दुबई येथे पाकिस्तान आणि विंडीज यांच्यात रंगला होता. तसेच हिंदुस्थानचा संघ आपला पहिला सामना 2019 साली बांगलादेशविरुद्ध कोलकात्याच्या ईडन गार्डन्सवर खेळला. हा सामना हिंदुस्थानने जिंकला होता.