भांडुपमधील शाळेत विद्यार्थिनींचा विनयभंग, उद्वाहनाच्या दुरुस्ती करणाऱ्या तरुणाचे कृत्य

शाळांमध्ये अल्पवयीन विद्यार्थिनी सुरक्षित आहेत की नाही असा गंभीर प्रश्न ऐरणीवर आला आहे. बदलापूरची संतापजनक घटना ताजी असताना मुली, महिलांसोबत कुठे ना कुठे अशा वाईट घटना घडतच आहे. भांडुपमधील एका शाळेत तीन अल्पवयीन विद्यार्थिनींचा एका तरुणाने विनयभंग केल्याचा प्रकार समोर आल्याने पालक व नागरिकांमधून संताप व्यक्त होत आहे.

भांडुप पश्चिमेकडील एका शाळेत बुधवारी सकाळी 10 वाजण्याच्या सुमारास उद्वाहनाच्या दुरुस्तीचे काम करण्यासाठी आरोपी तरुण आला होता. दरम्यान, 10 वर्षांच्या दोन व एक 12 वर्षीय विद्यार्थिनी शाळेच्या तळघरात योगाचा क्लास आटोपून वरच्या मजल्यावर जिना चढून जात असताना आधीच तेथे बराच वेळापासून उभ्या असलेल्या त्या तरुणाने कोणी नसल्याची संधी साधत एका मुलीला स्पर्श केला तर अन्य दोघींकडे अश्लील भावनेने बघत नको ते भाष्य केले. हा प्रकार मुलीने घरी गेल्यावर पालकांना सांगितल्यावर पालकांनी थेट पोलीस ठाणे गाठत याबाबत तक्रार दिली. भांडुप पोलिसांनी तत्काळ विनयभंग व ‘पोक्सो’ अन्वये गुन्हा दाखल करून गोपाल गौडा (27) या तरुणाला अटक केली. गोपाल हा मूळचा ओडिशाचा असून सध्या तो दिवा येथे राहतो. या घटनेनंतर पालकांमध्ये संतापाची लाट पसरली आहे.