ईव्हीएममुळे निवडणूक प्रक्रिया संशयास्पद झाली, मल्लिकार्जुन खरगे यांनी EVM वर उपस्थित केले प्रश्न

ईव्हीएममुळे निवडणूक प्रक्रिया संशयास्पद झाली आहे, असं काँग्रेस अध्यक्ष मल्लिकार्जुन खरगे म्हणाले आहेत. आज दिल्लीत काँग्रेस कार्यकारिणीची बैठक पार पडली. या बैठकीत महाराष्ट्र आणि हरियाणामधील पराभवावर विचारमंथन करण्यात आलं. ‘एक्स’वर एक पोस्ट करून खरगे यांनी बैठकीत त्यांनी मांडलेल्या मुद्द्यांची माहिती देताना असं म्हटलं आहे.

मल्लिकार्जुन खरगे म्हणाले की, ”निवडणूक आयोग ही घटनात्मक संस्था आहे, त्यामुळे त्याबद्दल जितके कमी बोलले तितके चांगले. मात्र देशात मुक्त आणि निष्पक्ष निवडणुका व्हाव्यात, ही निवडणूक आयोगाची घटनात्मक जबाबदारी आहे. ही जबाबदारी कितपत पार पाडली जात आहे, यावर वारंवार प्रश्न उपस्थित होत आहे.”

खरगे म्हणाले, ”अवघ्या 6 महिन्यांपूर्वी लोकसभेत महाविकास आघाडीच्या बाजूने निकाल लागलेल्या प्रकारानंतर विधानसभेचा निकाल राजकीय पंडितांच्याही समजण्यापलीकडचा आहे. असे परिणाम समोर आले आहेत की, कोणतेही त्याचे समर्थन करू शकत नाही.”

एक्सवर केलेल्या पोस्टमध्ये खरगे यांनी लोकसभेतील विजयाबद्दल प्रियंका गांधी आणि रवींद्र चव्हाण यांचे अभिनंदन केले आणि सांगितले की, आम्हाला अजून खूप काम करण्याची गरज आहे. या निवडणुकीच्या निकालातून आपल्याला धडा घ्यावा लागेल आणि आपल्या उणिवा लवकरात लवकर दूर करण्याचे काम करावे लागेल.

मल्लिकार्जुन खरगे म्हणाले की, गेल्या दोन निवडणुकांमध्ये आपण हरलो असलो तरी यामुळे हे वास्तव बदल नाही की, जनता त्रस्त आहे. बेरोजगारी, महागाई, आर्थिक विषमता हे आपल्या देशाचे ज्वलंत प्रश्न आहेत. जात जनगणना हा देखील आज महत्त्वाचा मुद्दा आहे. राज्यघटना, सामाजिक न्याय आणि समरसता हे लोकांचे प्रश्न आहेत. हे सर्व राष्ट्रीय प्रश्न आहेत. राज्यांच्या निवडणुकांच्या वेळी स्थानिक समस्याही लक्षात ठेवाव्या लागतील.