मोहन जोशी यांना ‘रंगकर्मी’ जीवनगौरव

मराठी नाटय़ कलाकार संघातर्फे दिला जाणारा ‘रंगकर्मी जीवनगौरव पुरस्कार’ यंदा ज्येष्ठ अभिनेते मोहन जोशी यांना जाहीर झाला. मराठी नाटय़ कलाकार संघातर्फे आयोजित ‘जागतिक रंगकर्मी दिवस’ सोहळय़ात मोहन जोशी यांना हा पुरस्कार प्रदान करण्यात येईल. हा सोहळा 25 नोव्हेंबर रोजी संध्याकाळी 6 वाजता माटुंगा येथील यशवंतराव चव्हाण नाटय़गृहात पार पडेल.

‘रंगकर्मी जीवनगौरव पुरस्कार’ प्रदान सोहळय़ासह ज्ञानेश पेंढारकर यांचा सांगीतिक कार्यक्रम सादर होईल. तसेच मोहन जोशी यांची प्रकट मुलाखतही होईल. या कार्यक्रमाला सर्वांना विनामूल्य प्रवेश आहे, अशी माहिती मराठी नाटय़ कलाकार संघातर्फे देण्यात आली.

  मराठी रंगभूमीसाठी सर्वस्व वाहिलेल्या नटवर्य भालचंद्र पेंढारकर यांच्या जन्मदिवसाचे औचित्य साधून 25 नोव्हेंबर हा दिवस कलाकार संघातर्फे ‘जागतिक रंगकर्मी दिवस’ म्हणून साजरा केला जातो. या दिवशी एका ज्येष्ठ व श्रेष्ठ रंगकर्मीचा सन्मान करण्यात येतो. व्यावसायिक रंगभूमीवर काम करणाऱया व रंगभूमीवरील सक्रिय रंगकर्मीचाही हक्काचा एक दिवस असावा, या उद्देशाने ‘जागतिक रंगकर्मी दिवस’ ही संकल्पना कलाकार संघाचे माजी अध्यक्ष प्रदीप कबरे यांनी राबविण्यास सुरुवात केली.