विद्यार्थ्याने वर्गातच मित्राचा गळा चिरला

वार्षिक समारंभावरून झालेल्या वादातून शाळेतील एकाने नववीतील विद्यार्थ्याचा वर्गातच काचेच्या तुकड्याने गळा चिरल्याची धक्कादायक घटना मांजरीतील शाळेत घडली. याप्रकरणी 14 वर्षीय मुलाविरुद्ध हडपसर पोलीस ठाण्यात खुनाचा प्रयत्न केल्याप्रकरणी गुन्हा दाखल केला आहे. हल्ल्यात 15 वर्षीय मुलगा गंभीर जखमी झाला असून, त्याच्यावर उपचार सुरू आहेत.

शाळेत तक्रारदाराचा मुलगा नववीत शिकायला आहे. आरोपी मुलगा त्याच्या वर्गात शिकायला असून, शाळेत वार्षिक समारंभाचे आयोजन करण्यात येणार होते. वार्षिक समारंभाच्या आयोजनावरून दोघांमध्ये वाद झाला होता. मंगळवारी (19 नोव्हेंबर) दुपारी अडीचच्या सुमारास पीडित मुलगा वर्गात बसला होता. त्यावेळी वर्गातील आरोपी मुलाने त्याच्यावर काचेच्या तुकड्याने वार केला. या घटनेत तो जखमी झाल्यामुळे वर्गात मुले घाबरली. आरोपीने पुन्हा त्याला जिवे मारण्याची धमकी दिली.

जखमी झालेल्या मुलाला शाळेतील शिक्षक आणि कर्मचाऱ्यांनी तातडीने खासगी रुग्णालयात दाखल केले.
खुनाचा प्रयत्न केल्याप्रकरणी मुलाला ताब्यात घेतले आहे. वरिष्ठ पोलीस निरीक्षक संतोष पांढरे यांनी घटनास्थळी भेट दिली. सहायक निरीक्षक दादासाहेब रोकडे तपास करत आहेत.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.