गोविंद पानसरे हत्या प्रकरण; एटीएसने कोर्टात सादर केला सीलबंद अहवाल

कॉम्रेड गोविंद पानसरे यांच्या हत्ये प्रकरणात कुटुंबियांकडून देण्यात आलेल्या पुरवणी जबाबाची चौकशी करण्यात आली असल्याचे स्पष्ट करत एटीएसने याचा सीलबंद अहवाल गुरुवारी उच्च न्यायालयात सादर केला. न्या. अजय गडकरी व न्या. कमल खाथा यांच्या खंडपीठासमोर हा अहवाल सादर करण्यात आला. त्याची न्यायालयाने नोंद करून घेतली. या प्रकरणात केवळ दोन आरोपी फरार असून अजून काही शिल्लक राहिलेले नाही, असे मत न्यायालयाने व्यक्त केले. कुटुंबियांच्या पुरवणी जबाबानुसार तपास करण्यात आला आहे. बेकायदा कृत्य प्रतिबंधक कायद्याचे कलम आरोपींवर लावता येणार नाही, असेही स्पष्ट करण्यात आले आहे. त्यामुळे अजून पुढे काय करता येईल, असा मुद्दा असल्याचे खंडपीठाने नमूद केले. यावर बाजू मांडण्यासाठी वेळ द्यावा, अशी विनंती पानसरे कुटुंबियांचे वकील अभय नेवगी यांनी केली. ती मान्य करत न्यायालयाने ही सुनावणी 2 डिसेंबर 2014पर्यंत तहकूब केली.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.