तुला आता पुराच करतो बघ! मिंध्यांच्या उमेदवाराची वृद्धाला धमकी

कर्जत-खालापूरमधील मिंधे गटाचे उमेदवार महेंद्र थोरवे हे एकीकडे त्यांच्या मित्र पक्षांवर बरळत असतानाच आज त्यांनी एका ज्येष्ठ नागरिकाला भररस्त्यात धमकावले. तुला आता पुराच करतो.. तुला पुरा नाही केला तर नाव नाही सांगणार साल्या, अशी शिवीगाळ करत थोरवे यांनी या ज्येष्ठ नागरिकाला धमकावले. हा व्हिडीओ व्हायरल होताच मतदारांमध्ये संतप्त प्रतिक्रिया उमटल्या.

मतदानाला अवघे नऊ दिवस शिल्लक राहिल्यामुळे सर्वच पक्षांच्या उमेदवारांनी प्रचाराचा धुरळा उडवून दिला आहे. आज मिंधे गटाचे उमेदवार कडाव येथील बाल दिगंबर गणपती मंदिर परिसरात प्रचारासाठी गेले तेव्हा तेथे ज्येष्ठ नागरिक मनोहर पाटील उभे होते. पाटील हे अपक्ष उमेदवार सुधाकर घारे यांच्या प्रचारात सहभागी झाले होते. थोरवे यांनी पाटील यांना हाक मारली. त्यांच्यात काही बोलाचाली झाली. मात्र अचानक थोरवेंचा पारा वाढला आणि त्यांनी थेट पाटील यांना शिवीगाळ करण्यास सुरुवात केली. पाटील यांनी हात जोडून तुम्ही शिवीगाळ करू नका असे सांगितले. मात्र थोरवे ऐकण्याच्या मनस्थितीत नव्हते.

असला लोकप्रतिनिधी काय कामाचा?

हा तमाशा सोशल मीडियावर टिपला जात असल्याचे थोरवेंच्या कार्यकर्त्यांना कळताच त्यांनी थोरवे यांची समजूत काढत त्यांना पुढे आणले. मात्र तोपर्यंत थोरवे शिवीगाळ करतच होते. हा व्हिडीओ सोशल मीडियावर चांगलाच व्हायरल झाला. जो वडिलांच्या वयाच्या कार्यकर्त्याला शिवीगाळ करून त्यांचा अपमान करतो तो लोकप्रतिनिधी काय कामाचा, अशी प्रतिक्रिया कर्जतकरांमधून उमटली.