क्राईम पेट्रोल फेम अभिनेता नितीन चौहानचे निधन, सहकलाराने केला आत्महत्येचा दावा

क्राईम पेट्रोल फेम अभिनेता नितीन चौहानचे गुरुवारी मुंबईत निधन झाले आहे. तो 35 वर्षांचा होता. नितिनच्या निधनामुळे टीव्ही इंडस्ट्रीवर शोककळा पसरली आहे. नितिनच्या सहकलाकारांनी त्याच्या मृत्यूला दुजोरा दिला आहे. नितिनचा मृत्यू नेमका कसा झाला याबाबत अद्याप माहिती समोर आली नाही. मात्र नितिनची माजी सहकलाकार विभूती ठाकूरने सोशल मीडियावर केलेल्या पोस्टमध्ये त्याने आत्महत्या केली असावा असा संशय व्यक्त होत आहे.

नितिन हा मूळचा उत्तर प्रदेशातील आहे. नितिन ‘क्राईम पेट्रोल’सह ‘एमटीव्ही स्पिट्सव्हिल्ला’, ‘जिंदगी डॉट कॉम’, ‘फ्रेंड्स’, ‘तेरा यार हू मै’ आदी मालिकेत काम केले आहे. दादागिरी 2 हा रिअॅलिटी शो जिंकल्यानंतर नितिनला खरी प्रसिद्धी मिळाली होती. नितिन 2022 मध्ये टीव्हीवर शेवटचा दिसला होता.

नितिनची सहकलाकार विभूती ठाकूरने सोशल मीडियावर दोघांचा फोटो शेअर करत त्याच्या निधनाबाबत दुःख व्यक्त केले आहे. ‘रेस्ट इन पीस माय डिअर. मला धक्का बसला आहे. ज्याप्रमाणे तू शरीराने सुदृढ आहेस, त्याप्रमाणे मनानेही संकटांचा सामना करायला सुदृढ हवा होतास’, असे विभूतीने म्हटले आहे. मुलाच्या निधनाची बातमी कळताच त्याचे वडील मुंबईत दाखल झाले आहेत.