किरकोळ वादातून पुरुषाची हत्या; बोरिवली येथील घटना

किरकोळ वादातून तरुणीने आणि तिच्या प्रियकराने एकाची लाथा-बुक्यांनी मारहाण व गळ्यावर ब्लेडने वार करून हत्या केल्याची घटना घडली आहे. प्रशांत पवार असे मृताचे नाव आहे. या प्रकरणी दोघांना कस्तुरबा मार्ग पोलिसांनी अटक केली. सोनी राजेशकुमार पाटील आणि रितेश चौहान अशी अटक आरोपींची नावे आहेत. कर्ज फेडण्याच्या वादातून ही हत्या झाल्याचे प्राथमिक तपासात समोर आले आहे.

बुधवारी सायंकाळी बोरिवली पूर्वच्या सुधीर फडके पुलाखाली एक जण जखमी अवस्थेत पडल्याची माहिती कस्तुरबा मार्ग पोलिसांना मिळाली. त्या माहितीनंतर पोलिसांचे पथक घटनास्थळी गेले. पोलिसांनी प्रशांतला रुग्णालयात दाखल केले. तेथे डॉक्टरांनी प्रशांतला मृत घोषित केले. प्रशांतच्या भावाने दिलेल्या फिर्यादीवरून पोलिसांनी गुन्हा नोंद केला. या गुह्याच्या तपासासाठी एक पथक तयार केले. तपासादरम्यान पोलिसांना महत्त्वाची माहिती मिळाली. त्या माहितीच्या आधारे पोलिसांनी सोनी आणि रितेशला ताब्यात घेतले.

पवार आणि आरोपी हे नेहमी पुलाखाली भेटत असायचे. रितेशने पवारकडून काही पैसे उसने घेतले होते. ते पैसे रितेशने परत केले नव्हते. त्यावरून त्याच्यात वाद होत असायचा. बुधवारी पवार पुलाखाली आला. पवारने रितेशला पैशांबाबत विचारणा केली, तेव्हा रितेशने पैसे परत करणार नसल्याचे सांगितले. त्यावरून वाद झाल्यावर रितेश आणि सोनीने पवारला लाथा-बुक्यांनी मारहाण केली. तसेच पवारच्या गळ्यावर ब्लेड मारून त्याला जखमी केले. त्यामुळे पवारचा मृत्यू झाला. त्या दोघांना अटक करून आज न्यायालयात हजर केले असता त्यांना पोलीस कोठडी सुनावली आहे.