शिवसेनेत इनकमिंग सुरुच; कोकणात अजित पवार गटाला धक्का, अजित यशवंतराव शिवबंधनात

विधानसभा निवडणुकीच्या तोंडावर महायुतीला एकापाठोपाठ एक धक्के बसत असून शिवसेनेत जोरदार इनकमिंग सुरू झाले आहे. शिवसेना पक्षप्रमुख उद्धव ठाकरे यांच्या उपस्थितीत ‘मातोश्री’ निवासस्थानी अजित पवार गटाचे महाराष्ट्र प्रदेश सरचिटणीस आणि प्रवक्ते अजित यशवंतराव यांनी पक्षप्रवेश केला.

रत्नागिरी जिल्ह्यातील अजित पवार गटाचे महाराष्ट्र प्रदेश सरचिटणीस आणि प्रवक्ते अजित यशवंतराव यांनी आज त्यांच्या सहकाऱ्यांसह शिवसेना (उद्धव बाळासाहेब ठाकरे) पक्षात प्रवेश केला. शिवसेना पक्षप्रमुख उद्धवसाहेब ठाकरे यांनी मनगटावर शिवबंधन बांधून त्यांचे पक्षात स्वागत केले. यावेळी शिवसेना नेते विनायक राऊत, उपनेते आमदार राजन साळवी तसेच पदाधिकारी-शिवसैनिक उपस्थित होते.

 

View this post on Instagram

 

A post shared by Saamana (@saamana_online)

उद्धव ठाकरे यांनी अजित यशवंतराव यांचे पक्षामध्ये स्वागत केले. तरुण, उमदा, सुशिक्षित आणि मनापासून काम करणारा तरुण शिवसेनेत आला, तेही कोणतीही राजकीय अपेक्षा ठेऊन नाही. अनेक जण येऊ इच्छितात पण तिकीट पाहिजे. तुम्ही विदाऊट तिकीट आलेला आहात. टीसी मीच असून माझी जबाबदारी आहे की तुमचा पुढचा प्रवास सुखकर झाला पाहिजे, असे उद्धव ठाकरे यावेळी म्हणाले. यावेळी मातोश्रीवर उपस्थित कार्यकर्त्यांनी शिवसेना झिंदाबाद… उद्धव ठाकरे तुम आगे बढो, हम तुम्हारे साथ है… हिंदूहृदयसम्राट शिवसेना प्रमुख बाळासाहेब ठाकरे यांचा विजय असो अशा घोषणा देत आसमंत दणाणून सोडला.