महिलेला आत्महत्या करण्यापासून रोखले; नेहरू नगर पोलिसांची चांगली कामगिरी

कुर्ल्याच्या नेहरू नगर पोलिसांनी एका महिलेचा जीव वाचवला. कौटुंबिक कलहातून टोकाची भूमिका घेत ती महिला आत्महत्या करणार होती. त्यासाठी तिने तयारी केली. पंख्याला फास लटकवला, पण वेळीच पोलीस तेथे धडकले आणि पुढील अनर्थ टळला.

नेहरू नगर येथील म्हाडा वसाहतीत गुरुवारी दुपारी हा प्रकार घडला. एक 35 वर्षीय महिला आत्महत्या करण्याच्या प्रयत्नात असून तिने घरात पंख्याला फासदेखील बांधला आहे, अशी माहिती पोलीस नियंत्रण कक्षाला मिळाली. याबाबत तत्काळ नेहरू नगर पोलिसांना कळविण्यात आले. त्यानुसार नेहरू नगर पोलीस ठाण्याच्या निर्भया पथकाच्या उपनिरीक्षक पाटील, महिला अंमलदार पोळ व चालक साबळे यांनी घटनास्थळी धाव घेतली आणि त्या महिलेला ताब्यात घेऊन पोलीस ठाण्यात नेले. तेथे वरिष्ठ अधिकाऱयांनी त्या महिलेचे समुपदेशन केले. सहकाऱयासोबत झालेल्या पैशांच्या वादातून आत्महत्या करण्याचा निर्णय त्या महिलेने घेतला होता, पण पोळ व त्यांच्या सहकाऱयांनी वेळीच धाव घेऊन महिलेला रोखल्याने अनर्थ टळला.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.