नांदेड लोकसभा मतदारसंघाच्या पोटनिवडणुकीसाठी रविंद्र चव्हाण यांना काँग्रेसची उमेदवारी जाहीर

महाराष्ट्राच्या विधानसभा निवडणुकीसोबतच महाराष्ट्रातील लोकसभेच्या नांदेड मतदारसंघाच्या पोटनिवडणुकीचीही घोषणा निवडणूक आयोगाने केली. 15 ऑक्टोबरला निवडणूक जाहीर होताच काँग्रेसने दोनच दिवसांत नांदेड लोकसभा मतदारसंघासाठी उमेदवाराच्या नावाची घोषणा केली आहे. काँग्रेसचे दिवंगत खासादर वसंतराव चव्हाण यांचे पुत्र रविंद्र चव्हाण यांना काँग्रेसकडून उमेदवारी घोषित करण्यात आली आहे. खासदार वसंतराव चव्हाण यांच्या निधनाने ही जागा रिक्त झाली होती.

Congress nominates Ravindra Vasantrao Chavan as its candidate for Maharashtra’s Nanded Lok Sabha bye-elections and Jingjang M. Marak for Meghalaya’s Gambegre assembly constituency bye-elections. pic.twitter.com/sM3pOODgf0

— ANI (@ANI) October 17, 2024

पोटनिवडणुकीसाठी जारी केलेल्या उमेदवारांच्या यादीत नांदेड लोकसभा मतदारसंघासाठी काँग्रेसने रविंद्र चव्हाण यांच्या नावाची घोषणा केली आहे. महाराष्ट्रातील विधानसभा निवडणुकीसोबतच म्हणजे 20 नोव्हेंबरला नांदेड लोकसभा मतदारसंघाच्या पोटनिवडणुकीसाठी मतदान होईल. आणि 23 नोव्हेंबरला निवडणुकीचा निकाल लागणार आहे.

लोकसभा निवडणुकीत नांदेड मतदारसंघातून काँग्रेसचे वसंतराव चव्हाण हे निवडून आले. लोकसभा निवडणुकीचा निकाल जून महिन्यात लागला. आणि त्याच्या दोन महिन्यांनी म्हणजे 26 ऑगस्टला खासदार वसंतराव चव्हाण यांचे निधन झाले. हैदराबाद येथील किम्स रुग्णालयात उपचार सुरू असताना त्यांची प्राणज्योत मालवली. वसंतराव चव्हाण यांच्या निधनाने नांदेड लोकसभा मतदारसंघाची जागा रिक्त झाली होती.

नांदेड लोकसभा पोटनिवडणूक

> निवडणूक अधिसूचना – 22 ऑक्टोबर 2024

> उमेदवारी अर्ज भरण्याची शेवटची तारीख – 29 ऑक्टोबर

> उमेदवारी अर्ज पडताळणी तारीख – 30 ऑक्टोबर 2024

> उमेदवारी अर्ज मागे घेण्याची शेवटची तारीख – 4 नोव्हेंबर 2024

> मतदानाची तारीख – 20 नोव्हेंबर 2024

> निकाल – 23 नोव्हेंबर 2024