मोदींचे सभास्थळ चिखलात; सभेवर सावट; धुवाँधार पावसामुळे मैदानावर राडा; तयारीचे तीन तेरा

पंतप्रधान नरेंद्र मोदी आज पुणे दौऱ्यावर येत असून, यानिमित्त स. प. महाविद्यालयाच्या मैदानावर होणाऱ्या सभेवर मुसळधार पावसाचे संकट आले आहे. मोदींच्या सभेची जय्यत तयारी सुरू करण्यात आली असली तरी गेल्या तीन-चार दिवसांपासून सुरू असलेल्या पावसामुळे सभेच्या ठिकाणी पाणी आणि चिखलाचे साम्राज्य आहे. सभेच्या दिवशीही पावसाचा ऑरेंज अलर्ट आहे. मैदानावर पाणी साचल्याने आणि चिखल झाल्याने त्यावर मात करण्यासाठी प्रशासनाची पराकाष्ठा सुरू आहे. चिखलावर खडी टाकण्याचे नियोजन केले आहे. सभामंडपातील चिखलामुळे सभेला येणाऱ्यांची गैरसोय होऊ नये यासाठी लोखंडी अँगलवर फळ्या टाकून बैठक व्यवस्था करण्याचे काम बुधवारी रात्री उशिरापर्यंत सुरू होते.

आगामी विधानसभा निवडणुकीच्या पार्श्वभूमीवर सरकारकडून विविध प्रकल्पांच्या भूमिपूजन, उद्घाटने आणि योजनांच्या घोषणांचा पाऊस सुरू आहे. पंतप्रधान मोदी हे गुरुवारी पुणे दौऱ्यावर येत आहेत. मेट्रो प्रकल्पाच्या सिव्हिल कोर्ट ते स्वारगेट या भूमिगत मार्गाचे उद्घाटन आणि स्वारगेट ते कात्रज या मार्गाचे भूमिपूजन पंतप्रधान मोदी यांच्या हस्ते आज होत आहे. यामध्ये इतरही प्रकल्पांचे भूमिपूजन आणि उ‌द्घाटनही होणार आहेत.

मोदींच्या दौऱ्यानिमित्त पुण्यात जय्यत तयारी सुरू करण्यात आली आहे. मात्र, मोदींच्या या दौऱ्यावर पावसाचं सावट आहे. बुधवारी शहरभर पावसाने थैमान घातले होते. मोदींच्या सभेची आणि सर्व व्यवस्थेची जय्यत तयारी सुरू आहे. मात्र, गेल्या तीन-चार दिवसांपासून सुरू असलेल्या पावसामुळे सभामंडपात पावसाचे पाणी आणि चिखल होऊन सर्वत्र दलदल झाली आहे. ज्या मार्गाने मोदी स्टेजवर जाणार आहेत, त्या मार्गावर आणि मैदानावर सगळीकडे चिखलाचं साम्राज्य पसरलं आहे.

स्टेजखाली मोठ्या प्रमाणात पाणी साचले आहे, त्या ठिकाणी चिखल झालेला आहे. महापालिका आणि मेट्रोचे अधिकारी सभास्थळी पाहणी करीत आहेत. त्यामुळे बुधवारी उशिरापर्यंत व्यासपीठाच्या परिसरात व दलदलीवर खडी टाकण्याचे काम सुरू होते. यासाठी खडीचे दहा ते बारा ट्रक मागविण्यात आले होते. त्यातच आता हवामान विभागाने गुरुवारीही ऑरेंज अलर्ट म्हणजेच मुसळधार पावसाचा अंदाज वर्तविला आहे. या परिस्थितीवर मात करून सभा यशस्वी करण्याचे आव्हान प्रशासनासह भाजपसमोर राहणार आहे.