मनोज जरांगे यांची तब्येत खालावली, रक्तदाब कमी; साखरेचे प्रमाणही घटले

उपोषणाच्या तिसऱ्या दिवशी मनोज जरांगे-पाटील यांची प्रकृती खालावली आहे. जरांगे यांचा रक्तदाब कमी झाला असून साखरेचे प्रमाणही घटले आहे. वैद्यकीय पथकाने तपासणी करून जरांगे यांना उपचार घेण्याची विनंती केली. परंतु जरांगे यांनी उपचार घेण्यास नकार दिला.

तालुका आरोग्य अधिकारी डॉ. अनिल वाघमारे यांनी जरांगे यांच्या प्रकृतीची तपासणी केली. त्यात त्यांचा रक्तदाब आणि रक्तातील साखरेचे प्रमाण घटल्याचे आढळून आले. दरम्यान, भारतरत्न डॉ. बाबासाहेब आंबेडकर यांचे पणतू राजरत्न आंबेडकर यांनी आज मनोज जरांगे यांची भेट घेतली. जरांगे यांची प्रकृती खालावल्याचे पाहून त्यांना अश्रू अनावर झाले. या वेळी बोलताना त्यांनी मनोज जरांगे यांच्या केसालाही धक्का लागला तर महाराष्ट्र सहन करणार नाही, असा इशारा दिला.

ओबीसींचे आरक्षण वाचवण्यासाठी वडीगोद्रीत दोन ठिकाणी उपोषण सुरू झाले आहे. प्रा. लक्ष्मण हाके हे वडीगोद्रीत उपोषणाला बसले असून मनोज ससाणे हे आपल्या सहकाऱ्यांसह आंतरवालीच्या वेशीवर उपोषण करत आहेत. सरकारने सगेसोयऱ्यांच्या अध्यादेशाची अंमलबजावणी करू नये, असा इशारा मनोज ससाणे यांनी दिला.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.