Pune News – अनैतिक संबंधातून आधी प्रियकराचा काटा काढला, मग पत्नीलाही संपवण्याचा प्लान होता; पण…

अनैतिक संबंधाच्या रागातून बिहारमधील शिक्षकाने पुण्यात येऊन पत्नीच्या प्रियकराची हत्या केल्याची घटना उघडकीस आली आहे. आरोपी ट्रेन पकडून बिहारला पळण्याच्या तयारीत असतानाच पिंपरी-चिंचवड पोलिसांनी कल्याणमध्ये त्याला गाठले आणि बेड्या ठोकल्या. राजीव कुमार असं आरोपीचं नाव आहे. तर प्रविण महतो असे मयताचे नाव आहे.

राजीव कुमार हा बिहारमधील सरकारी शाळेत शिक्षक आहे. राजीवचे सात वर्षांपूर्वी लग्न झाले होते. मात्र गेल्या चार वर्षांपासून कौटुंबिक वादामुळे पती-पत्नी विभक्त राहत आहेत. यादरम्यान आरोपीच्या घराशेजारी राहणारा प्रविण पत्नीच्या संपर्कात आला. दोघांनी एकमेकांना मोबाईल नंबर दिले. मग दोघांमध्ये बोलणे सुरु झाले. हळूहळू दोघांमध्ये मैत्री मग प्रेमसंबंध जुळले.

प्रविण बिहारला गावी गेला की दोघांच्या गाठीभेटी होत असत. दीड महिन्यांपूर्वी आरोपी राजीवच्या पत्नी आणि प्रविणचा एक फोटो नजरेस पडला. हा फोटो पाहताच राजीवचा संताप झाला आणि त्याने दोघांचा काटा काढण्याचे ठरवले. मात्र प्रविण हा पुण्यात नर्सरी चालवत होता.

प्रविणच्या नर्सरीत काम करून बिहारला परतलेल्या धीरजला राजीवने गाठले. धीरजसोबत त्याने पुणे गाठले. त्यानंतर मंगळवारी रात्री 12 च्या सुमारास बावधन येथील नर्सरीवर येऊन प्रविणचा गळा चिरुन त्याची हत्या केली. यानंतर आरोपींनी पुन्हा पुणे स्टेशन गाठले आणि बिहारसाठी रवाना झाले.

याचदरम्यान हिंडवडी पोलिसांना बावधनमध्ये एका व्यक्तीची हत्या झाल्याची माहिती मिळाली. पोलिसांनी घटनास्थळ गाठून वेगाने तपास सुरु केला. यावेळी प्रविणच्या अनैतिक संबंधाची माहिती पोलिसांना मिळाली. त्या दृष्टीने तपास करत पोलिसांनी राजीवचे लोकेशन काढले असता तो बिहारमधून पुण्यात आल्याची आणि बिहारला जात असल्याची माहिती मिळाली. त्यानुसार पोलिसांनी प्रविणचे लोकेशन ट्रेस करत कल्याण पोलिसांच्या मदतीने कल्याणमधून राजीवसह धीरजला अटक केली.