जरा जपून… गृहिणींनो सावधान! बंदी घातलेला स्वस्त पण घातक लसूण बाजारात आलाय, गुजरातेत गोणीच्या गोणी आढळल्या

चीनची घुसखोरी रोखण्यात सपशेल अपयशी ठरलेले एनडीए सरकार आता बंदी घातलेल्या घातक चिनी मालाचा तस्करीद्वारे हिंदुस्थानच्या बाजारपेठेत होणारा शिरकाव रोखण्यातही पह्ल ठरल्याचे उघड झाले आहे. बंदी घातलेला स्वस्त, परंतु आरोग्यासाठी अत्यंत घातक असलेला लसूण बाजारात आला आहे. विशेष म्हणजे पंतप्रधान नरेंद्र मोदी यांच्या गुजरातमध्येच या लसणाच्या गोणीच्या गोणी आढळल्यामुळे एकच खळबळ उडाली आहे. हा लसूण गुजरातच्या बाजारपेठेतून महाराष्ट्र आणि इतर राज्यांमध्येही दाखल होऊ शकतो. त्यामुळे हा लसूण मसाल्यांद्वारे आपल्या जेवणापर्यंत पोहोचणार नाही याची दक्षता घ्यावी लागणार असून गृहिणींना सतर्प राहावे लागणार आहे.

कीटकनाशकांचा प्रचंड भडीमार केल्याने या लसणाला बुरशीजन्य कीड लागण्याचा धोका संभवतो. त्यामुळे हा चिनी लसूण भारतीय बाजारपेठेतून हद्दपार करण्यात आला होता. आरोग्याला अत्यंत अपायकारक असलेल्या या लसणावर 2014 पासून हिंदुस्थानात बंदी घालण्यात आली आहे. तरीही चिनी लसूण हिंदुस्थानच्या बाजारपेठेत तस्करीद्वारे दाखल झाल्याचे चित्र आहे. हिंदुस्थानी लसणाच्या तुलनेत चिनी लसूण लक्षणीयरीत्या स्वस्त असल्याने तो आपसूकच ग्राहकांना आकर्षित करतो. बेकायदेशीररीत्या बाजारात विक्रीसाठी आणण्यात आलेला हा लसूण ग्राहक नकळत खरेदी करत असल्याचेही उघड झाले आहे.

गुजरातमध्ये 30 गोणी सापडल्यानंतर सरकार सतर्क

गुजरातमधील राजकोटमध्ये चिनी लसणाच्या तब्बल 30 गोणी सापडल्या. गोंडल येथील पृषी उत्पन्न बाजार समितीमध्ये चिनी लसूण आढळून आल्याने मोठा गोंधळ उडाला. व्यापाऱयांनी गोंडल एपीएमसीमध्ये चिनी लसणाची बेकायदेशीररीत्या होत असलेली विक्री पाहून थेट लसणाचा लिलाव थांबवला, या बेकायदेशीर विक्री खरेदीविरोधात व्यापाऱयांनी आंदोलनही केले.

चिनी लसूण कसा ओळखाल?

चिनी लसूण आकाराने लहान असतो. त्याचा रंग फिकट पांढरा किंवा फिकट गुलाबी असतो. याउलट हिंदुस्थानी लसूण मोठा आणि सामान्यतः पांढरा किंवा मलई रंगाचा असतो. हिंदुस्थानी लसणाचा वास अधिक तीव्र असतो.